ئه‌و تیپه‌ى سروودى نیشتمانییان له په‌رله‌مان پێشكه‌شكرد 8 مانگه مووچه‌یان وه‌رنه‌گرتووه
پێشتر له مانگى ئابى ڕابردوودا، ئه‌ندامانى تیپی سه‌مفۆنیای نیشتمانى عێراقی، كه ته‌مه‌نى تیپه‌كه‌یان نزیكه‌ى 70 ساڵ ده‌بێت، داوایان كرد، مووچه‌كه‌یان كه له‌سه‌ره‌تاى ئه‌مساڵه‌وه وه‌رنه‌گرتوه، خه‌رج بكرێت و گرێبه‌سته‌كانیان بۆ نوێ بكرێته‌وه.
به‌پێی زانیارییه‌كان، مووچه‌ى هه‌ر ژه‌نیارێكی تیپه‌كه، ته‌نها 500 دۆلارى ئه‌مریكییه و مووچه‌ى سه‌رۆكى تیپه‌كه‌ش 1250 دۆلاره، كۆى خه‌رجییه‌كانی تیپه‌كه‌ش، مانگانه 85 هه‌زار دۆلاره.
به‌پێی ڕێكاره‌كانى حكوومه‌ته‌كه‌ى حه‌یده‌ر عه‌بادی، ئه‌وانه‌ى له تیپه‌كه‌دا ژه‌نیارن، ناتوانن مووچه وه‌ربگرن، بۆیه ته‌نها ئه‌وانه‌ی مووچه‌یان له شوێنی دیكه‌وه هه‌یه، یان كارى دیكه ده‌كه‌ن، له تیپه‌كه‌دا به‌رده‌وامن، چونكه وه‌ك یه‌كێك له ئه‌ندامانى تیپه‌كه ڕای گه‌یاندووه: "به‌شێك له ژه‌نیاره‌كان ئه‌وه‌نده پاره‌یان نییه بتوانن له ڕاهێنانه‌كاندا ئاماده ببن، بۆیه ئێستا ته‌نها یه‌ك له‌سه‌ر سێی ئه‌ندامانى تیپه‌كه، ماونه‌ته‌وه".
ئه‌مڕۆ كردنه‌وه‌ى خولى چواره‌مى ئه‌نجومه‌نى نوێنه‌رانى عێراق، به گوتنه‌وه‌ى سروودی نیشتمانى عێراق، كه له‌لایه‌ن تیپی سه‌مفۆنیای نیشتمانى عێراقه‌وه ئاماده كرابوو، ده‌ستی پێكرد.
باسنيوز
