هه‌رێمی كوردستان و ئێران وه‌كو دوو دراوسێ خاوه‌ن په‌یوه‌ندییه‌كی مێژوویی و سیاسیی دوور و درێژن له‌ ناوچه‌كه‌دا، به‌ڵام كاریگه‌ری سزا ئابوورییه‌كانی ئه‌مەریكا بۆ سه‌ر ئێران، وایكردووە له‌باره‌ی ئاینده‌ی په‌یوه‌ندییه‌كانی هه‌رێمی كوردستان و ئێرانەوە لێره‌ و له‌وێ قسه‌ی جیاوازی لەسەر بكرێت. به‌رپرسێكی فه‌رمانگه‌ی په‌یوه‌ندییه‌كانی ده‌ره‌وه‌ی هه‌رێمی كوردستانیش له‌ رێگه‌ی كوردستان24 ەوە رای فه‌رمی حكوومه‌تی هه‌رێمی كوردستان ئاشكرا ده‌كات.

عه‌بدوڵڵا ئاكره‌یی، بەڕێوەبەری گشتی په‌یوه‌ندییه‌كانی نێوان هه‌رێمی كوردستان و ئێران بە كوردستان24 راگەیاند: "پەیوەندییەكانی ئێمە و ئێران ھی ئەمڕۆ نییە، لە ماوەی رابردوو ئەگەر لە سنوورەكان كێشەیەكمان ھەبووبێت بە لێك تێگەیشتن چارەسەرمان كردووە".

گوتیشی: "پەیوەندیی و مامەڵە بازرگانییەكانمان لەگەڵ ئێران بەردەوام دەبێت، چونكە وەك ھەرێمی كوردستان پێویستیمان پێیە، بەڵام ئەگەر لەلایەن حكوومەتی عێراق بڕیارێك لەبارەی خاڵە سنوورییەكان دەربچێت و ھەموو سنوورەكانی بگرێتەوە، ئەوكات وەك ھەرێمی كوردستان پابەندی بڕیارەكە دەبین".

عه‌بدوڵڵا ئاكره‌یی، ئاماژەی بەوەشدا: "تائێستا ھیچ بڕیارێك لە حكوومەتی عێراق لەبارەی خاڵە سنوورییەكانی ئێران دەرنەچووە، تەنانەت ئێمە داوای ئەوە دەكەین كە پەیوەندیی و ئاڵوگۆڕە بازرگانییەكان بەرەوباشتر بچێت".

ھەر پەیوەست بەو پرسە د. سه‌باح سوبحی، شارەزای سیاسی پێی وایە: "پێویستە كاتێك كێشەیەكی ھەرێمی ھەیە حكوومەتی ھەرێمی كوردستان لە لێدوانێكی فەرمیدا رای خۆی رابگەیەنێت، بۆ ئەوەی لێدوان و بۆچوونی جیای لەبارەوە نەدرێت، چونكە كاراكتەری جیا ھەن لەنێو پەیوەندییەكان، لە رووی حزبی و ئابووریی و بازرگانییەوە، لەو جۆرە بڕیارانە ھەندێكیان سوودمەند و ھەندێكیش زەرەرمەندن، ھەر یەكێكیش لەوانە بە جۆرێك لە بابەتەكان دەڕوانن".



K24