"هێزه سیاسییه‌كان له مه‌رجه‌كانی سه‌در كۆده‌بنه‌وه"
قه‌حتان جبووری، گوته‌بێژ به‌ناوی هاوپه‌یمانێتی سائیروون له به‌یاننامه‌یه‌كدا ده‌ڵێت: "ئه‌و مه‌رج و پێوه‌رانه‌ی موقته‌دا سه‌در دیاریكردوون، پێشوازییه‌كی فراوانی لێكراوه‌و له ناوه‌نده فه‌رمی و میلله‌كاندا قه‌بووڵ ده‌كرێت، چونكه گوزارشت له‌و پێوه‌رانه ده‌كات كه پێویسته له سه‌رۆكوه‌زیرانی داهاتوودا هه‌بێت و سه‌رجه‌م مه‌رجه‌كانی قه‌بووڵ بێت و جێبه‌جێیان بكات".
هه‌روه‌ها گوتوویه‌تی: "هاوپه‌یمانێتی سائیروون كه پله‌ی یه‌كه‌می به‌ده‌ستهێناوه، هێشتا پارێزگاریی له قورسایی جه‌ماوه‌ری و سیاسی خۆی ده‌كات و ناكرێت په‌راوێز بخرێت ئه‌گه‌ر ره‌وشه‌كه به‌هه‌ر شێوه‌یه‌كیش بێت. ئه‌وه‌شی سائیروون ده‌یڵێت بۆچوونییه‌تی له‌سه‌ر پرسه‌كان و سرووشتی په‌یوه‌ندییه‌كانی له‌گه‌ڵ هێزه سیاسییه‌كانی دیكه‌دا، به‌ڵكو پرۆگرام و تایبه‌تمه‌ندییه‌كانێتی پێش هه‌ر كه‌سێك و ئه‌وه‌ش وایكردووه هێزی قایلكردنی لایه‌نه‌كانی دیكه‌ی هه‌بێت".
قه‌حتان جبووری گوتویه‌تی: "ئه‌وه‌ی له قۆناغی داهاتوودا ده‌یكه‌ین یه‌كخستنی دید و بۆچوونه نیشتمانییه‌كانه كه پشت به‌و تایبه‌تمه‌ندی و مه‌رجانه ده‌به‌ستن، ئه‌وه‌ی سه‌در دیاریكردووه وه‌ك نه‌خشه رێگایه‌كه و له توانایدایه لایه‌نێك له لایه‌نێكی دیكه نزیكبكاته‌وه".
هه‌روه‌ها ده‌ڵێت: "لێكتێگه‌یشتنه‌كانمان له‌گه‌ڵ لایه‌نه‌كانی دیكه‌دا هیچ گۆڕانكارییه‌كی به‌سه‌ردا نه‌هاتووه، چونكه ئێمه پشت ئه‌ستوورین به به‌رنامه‌یه‌ك نه‌ك ته‌نها كه‌سێك".
له‌م دواییانه‌دا موقته‌دا سه‌در 40 مه‌رجی بۆ ده‌ستنیشانكردنی سه‌رۆكوه‌زیرانی داهاتوو راگه‌یاندبوو.
K24
