هاوپەیمانیی سائیرون، کە موقتەدا سەدری رێبەری رەوتی سەدر رێبەرایەتی دەکات، پێکهێنانی حکوومەتی رزگاریی نیشتمانی لە عێراق رەت دەکاتەوە.



رائید فەهمی، سکرتێری گشتیی حزبی شیوعیی عێراق و سەرکردەیەکی سائیرون بە میدیاکانی وڵاتەکەی راگەیاندووە، حکوومەتی رزگاریی نیشتمانی دەرگا بۆ تاکڕەوی و دیکتاتۆریەت دەکاتەوە.



رائید فەهمی ئاماژەی بەوە کردووە، کە سائیرون هەموو هەوڵەکان بۆ پێکهێنانی ئەم جۆرە حکوومەتە رەت دەکاتەوە، کە ئەیاد عەللاویی سەرۆکی ئیئتیلافی نیشتمانی هەوڵی بۆ دەدات.



سکرتێری حزبی شیوعیی عێراق پێی وایە بە پێکهێنانی حکوومەتی رزگاریی نیشتمانی، کارکردن بە دەستوور رادەگیرێت، ئازادییەکان سنوورادر دەکرێن و بڕیارەکان بە تاکڕەوی دەدرێن و وڵات بەرەو دیکاتۆریەت دەچێتەوە.



بەپێی ئەنجامەکان، هاوپەیمانیی سائیرون لە هەڵبژاردنی رۆژی 12/5/2018، 54 کورسی بەدەست هێناوە و پلەی یەکەمی لیست و هاوپەیمانییەکانی وەرگرتووە.












باسنيوز