ئێوارەی ئەمڕۆ پێنجشەممە لە پارێزگای (میسان)ی خوارووی عێراق خۆپێشاندانەكانی ناڕەزایی هاووڵاتیان لەبەر نەبوونی ئاوی خواردنەوە و وزەی كارەبا و هەلی كار دەستی پێكردەوە.

خۆپێشاندەرانی شارۆچكەی مەشرەح سەر بەپارێزگای میسان ڕێگەی دەروازەی خاڵی سنووری (شەیب)یان گرتووە، داوای خزمەتگوزاریە سەرەتاییەكان لە حكوومەتی عێراق دەكەن

هێزە ئەمنیەكانی عێراق دەمودەست گەیشتوونەتە شوێنی خۆپێشاندانەكە و هەوڵی كردنەوەی ڕێگەی دەروازەی شەیب دەدەن.

ماوەی 11 ڕۆژە زنجیرەیەك خۆپێشاندانی نارەزایی شارەكانی ناوەڕاست و باشووری عێراقی گرتووەتەوە و سەرەتا لە پارێزگای بەسرای دەوڵەمەند بەنەوت دەستی پێكرد، هاووڵاتیان داوای خزمەتگوزارییە سەرەتاییەكانی وەك ئاوی خواردنەوە و وزەی كارەبا دەكەن، بەڵام هێزە ئەمنیەكانی حكوومەتی عێراق بەئاگر و ئاسن وەڵامیان داونەتەوە و تا ئێستە زیاتر لە 200 كوژراو و بریندار لەنێو ڕیزەكانی خۆپێشاندەران هەن.










باسنيوز