لەژێر فشاری خۆپیشاندەران، سەرۆک وەزیرانی عێراق زنجیرەیەک بڕیاری دەرکرد کە خۆی لە ھەڵوەشاندنەوەی ئەنجومەنی کارگێڕیی فڕۆکەخانەی نێودەوڵەتیی نەجەف و تەرخانکردنی بڕی ٣.٥ تریلیۆن دیناردا دەبینێتەوە.

میدیاکانی عێراق بڵاویان کردەوە، حەیدەر عەبادی، سەرۆک وەزیرانی عێراق حەوت بڕیاری لەژێر کاریگەریی خۆپیشاندانەکانی باشووری عێراق دەرکردووە، بەتایبەتیش دوای کۆبوونەوەی لەگەڵ ھاووڵاتییان و عەشایەرەکانی باشووری عێراق.

یەکێک لە بڕیارەکانی عەبادی، تەرخانکردنی بری ٣.٥ تریلیۆن دینارە دەست بەجێ بۆ پارێزگای بەسڕە و خەرجکردنی بۆ کەمکردنەوەی ڕێژەی سوێریی ئاو و چارەسەرکردنی کێشەکانی کارەبا و پێشکەشکردنی خزمەتگوزاریی پزیشکی.

ھەر لە چوارچێوەی بریارەکانی عەبادیدا، کارەکانی وەبەرھێنان لە کەرتی نیشتەجێبوون و قوتابخانە و خزمەتگوزرییەکان دەبێت. لەگەڵ پێدانی پلەی وەزیفی بۆ ئەو کەسانەی بێکار کەوتوون.

لە بەشێکی دیکەی بڕیارەکانی عەبادیدا، کردنەوەی زیاتری ئاو بۆ پارێزگاکانی (بەسرە، زیقار، دیوانیە و موسەنا)یە، فەرمانیش بە دەزگا پەیوەندیدارەکان کراوە کە زیادەڕۆیی بۆ سەر بەشەئاوەکان قەدەغە بکەن.

ھەر بەپێی ئەو بڕیارانەی عەبادی داویەتی، بەڕێوەبەری فڕۆکەخانەی نێودەوڵەتیی نەجەف لەکارەکەی لادراوە و ئەنجومەنی کارگێڕیی فڕۆکەخانەی نەجەفیش ھەڵوەشێندراوەتەوە. ھاوکات ژمارەیەک فەرماندەی سەربازی دوورخراونەتەوە و بەرپرسانی محەلیش کارەکانیان ڕاگیراوە و کۆمپانیا نەوتییە بیانییەکان پابەند کراون کە ڕێژەی ٣٠٪ی کرێکارەکانیان خەڵکی عێراق بن.









باسنيوز