گه‌شته‌كانى فڕۆكه‌خانه‌ى نه‌جه‌ف ده‌ستيانپێكرده‌وه
شه‌وى رابردوو، سه‌دان هاووڵاتى خۆپيشانده‌ر، هه‌ڵيانكوتايه سه‌ر فڕۆكه‌خانه‌ى نێوده‌وڵه‌تى نه‌جه‌ف.
به هۆى خۆپيشاندانه‌كانه‌وه، گه‌شته‌كانى فڕۆكه‌خانه‌ى نه‌جه‌ف راگيران و سه‌رجه‌ميان گواسترانه‌وه بۆ به‌غدا.
خۆپيشاندان له شارى نه‌جه‌ف هاوكاته له‌گه‌ڵ ئه‌و شه‌پۆله ناڕه‌زايه‌تييه‌ى له پارێزگاكانى باشوورى عێراق ده‌ستيپێكردووه.
دانيشتوانى به‌سره، نه‌جه‌ف، زيقار، ميسان و واست رۆژانه خۆپيشاندان ئه‌نجامده‌ده‌ن و داواى باشكردنى ره‌وشى گوزه‌ران و دابينكردنى ئاو و كاره‌با ده‌كه‌ن.
هێزه ئه‌منييه‌كان شه‌وى رابردوو بڕيارى قه‌ده‌غه‌ى هاتوچۆيان به‌سه‌ر نه‌جه‌فدا سه‌پاند و به‌ره‌به‌يانى ئه‌مڕۆ قه‌ده‌غه‌ى هاتوچۆيان هه‌ڵگرت.
ئه‌مڕۆ شه‌شه‌م رۆژه له به‌سره خه‌ڵك ناڕه‌زايه‌تى ده‌رده‌بڕێت و خۆپيشاندان ئه‌نجامده‌دات.
دوێنێ هه‌ينى له پارێزگاى ميسان، هاووڵاتييه‌كى خۆپيشانده‌ر به فيشه‌كى هێزه ئه‌منييه‌كان گيانى له‌ده‌ستدا و 15 هاووڵاتى ديكه بريندار بوون.
هه‌ر له‌و چوارچێوه‌يه‌دا، دوێنێ حه‌يده‌ر عه‌بادى سه‌رۆك وه‌زيرانى عێراق له برۆكسله‌وه گه‌ڕايه‌وه عێراق و سه‌ردانى به‌سره‌ى كرد.
خۆپيشانده‌رانى به‌سره شه‌وى رابردوو هه‌ڵيانكوتايه سه‌ر ئه‌و ميوانخانه‌يه‌ى كه عه‌بادى تێيدا مابوويه‌وه.
k24
