ڕه‌وتى سه‌در سه‌رچاوه‌ى داهاتى خۆى ئاشكرا ده‌كات
دوێنێ چوارشه‌ممه، شاندێك به‌نوێنه‌رایه‌تی موقته‌دا سه‌در، پاره‌ى قه‌ره‌بوویان ڕاده‌ستى ئه‌و خێزانانه كرد، كه به‌هۆى ته‌قینه‌وه‌ى كۆگایه‌كی چه‌ك و ته‌قه‌مه‌نییه‌وه له‌ناوچه‌ى سه‌درى به‌غدا، زیانیان پێگه‌یشت. دواتر له‌لایه‌ن چالاكوانانى تۆڕه كۆمه‌ڵایه‌تییه‌كانه‌وه، داواى ئاشكراكردنى سه‌رچاوه‌ى ئه‌و پاره‌یه و داهاتى ڕه‌وته‌كه، كرا.
زیا ئه‌سه‌دی، به‌رپرسی نووسینگه‌ى موقته‌دا سه‌در، له لێدوانێكی ڕۆژنامه‌وانیدا ڕای گه‌یاند: "زۆرێك له‌داهاتى ڕه‌وته‌كه، له بڕینی مووچه‌ى كارمه‌ندان و به‌رپرسانى سه‌ر به‌ڕه‌وته‌كه‌یه ، كه له ده‌زگا حكوومییه‌كان ده‌وام ده‌كه‌ن".
ئاماژه‌ى به‌وه‌شدا، كه به‌شێكى تر له داهاته‌كه، له‌و به‌خشینانه‌یه كه بازرگانان و سه‌رمایه‌داران و هاوسۆزانى ڕه‌وتى سه‌در خۆبه‌خشانه پێشكه‌شى ڕه‌وتى سه‌درى ده‌كه‌ن.
له 6ى حوزیرانى 2018 ، به‌هۆى ته‌قینه‌وه‌ى كۆگایه‌كی چه‌ك و ته‌قه‌مه‌نى له‌ناو یه‌كێك له حوسه‌ینییه‌كانى شارۆچكه‌ى سه‌در له به‌غدا كه سه‌ر به ڕه‌وتى سه‌در بوو، ده‌یان كه‌س بوون به قوربانیی و ده‌یان خانووش ڕووخان.
باسنيوز
