به‌ گوێره‌ی رۆژنامه‌یه‌كی كه‌نداو، له‌ ئێستادا ئێران پاڵپشتی یه‌كخستنی نێو ماڵی سووننه‌ ده‌كات، بۆ ئه‌وه‌ی گرفت بۆ كوتله‌ گه‌وره‌ "تێكه‌ڵاوه‌كه‌" درووست بكات.

رۆژنامه‌ی "العربی جدید" له‌ راپۆرتێكدا بڵاویكردووه‌ته‌وه‌، چیدیكه‌ پێكهینانی كوتله‌یه‌كی یه‌كگرتووی سووننی، له‌ چوارچێوه‌ی لایه‌نه‌ ناوخۆییه‌كانی عێراق كورت نه‌بووه‌ته‌وه‌، به‌ڵكو ئێستا ئێرانیش یه‌كێكه‌ له‌و وڵاتانه‌ی پاڵپشتی یه‌كخستنی نێوماڵی سووننه‌ ده‌كات.

به‌ گوێره‌ی راپۆرته‌كه‌، ئه‌و هه‌وڵانه‌ی ئێران بۆ شكستپێهێنانی پرۆژه‌، یاخود بیرۆكه‌ی پێكهێنانی كوتله‌یه‌كی سیاسییه‌ كه‌ هه‌موو پێكهاته‌كانی تێدابێت و تایه‌فه‌گه‌ری ده‌بڕێت، كه‌ هه‌ندێك به‌رپرس و لیستی براوه‌ی عێراق باسی لێوه‌ ده‌كه‌ن.

رۆژنامه‌كه‌ له‌ زاری چه‌ند به‌رپرسێكی سووننه‌ی عێراق بڵاویكردووه‌ته‌وه‌، ئێران یه‌كێكه‌ له‌و وڵاتانه‌ی گوشاره‌كانی بۆ پێكهینانی كوتله‌یه‌كی یه‌كگرتوویی سووننی چڕكردووه‌ته‌وه‌.

ئاماژه‌ به‌وه‌ش ده‌كات، ئه‌و كاره‌ رووبه‌ڕووی چه‌ند ئاسته‌نگێك ده‌بێته‌وه و ئاسان نییه‌، به‌هۆی ئه‌وه‌ی به‌ر له‌ هه‌ڵبژاردن هه‌ندێك له‌ سووننه‌كان هاوپه‌یمانێتییان له‌گه‌ڵ هێزی دیكه‌ی شیعه‌ پێكهیناوه‌، هاوكات وڵاتانی دیكه‌ی وه‌كو ئه‌مه‌ریكا و سعوودیه‌ش پاڵپشتی كوتله‌یه‌كی یه‌كگرتووی سووننی ده‌كه‌ن، به‌ڵام مه‌به‌سته‌كه‌یان جیاوازه‌.

دوای هه‌ڵبژاردنی 12ی ئایار/ مایۆی 2018، گفتوگۆی پێكهێنانی كابینه‌ی نوێ، له‌ نێوان لایه‌نه‌ براوه‌كانی هه‌ڵبژاردنه‌كه‌، چڕبووه‌ته‌وه‌، بۆ ئه‌وه‌ی گه‌وره‌ترین كوتله‌ی ناو په‌رله‌مان پێكهبنێرێت و بتوانرێت متمانه‌ به‌ سه‌رۆك وه‌زیران و كابینه‌ی داهاتوو بده‌ن.



K24