ژمارەیەک چەکداری نەناسراو لە شاری کەرکووک تەقەیان لە ئەفسەرێکی دەزگای هەواڵگریی عێراقی کرد.



بەپێی زانیارییەکان، ئەحمەد نیهاد محەمەد، ئەفسەری دەزگای هەواڵگریی عێراقی لە گەڕەکی یەکی حوزەیران لە کەرکووک تەقەی لێ کراوە و بە سەختی بریندار بووە.



رووداوی تەقەکردنەکە شەوی شەممە 2/6/2018 رووی داوە و دواتر چەکدارەکان هەڵاتوون و ئەو ئەفسەرەش گواستراوەتەوە نەخۆشخانەیەکی شاری کەرکووک.



دوای داگیرکردنی شاری کەرکووک لەلایەن میلیشیاکانی حەشدی شەعبییەوە، دەیان گرووپ و میلیشیای چەکداری لە شارەکە بڵاو بوونەتەوە و هێزە ئەمنییەکان توانای پاراستنی ئاسایشی شارەکە و ئەفسەر و کارمەندەکانی خۆشیان نییە.



ڕۆژی 16ی ئۆكتۆبه‌ری 2017، کەرکووک، خورماتوو و ناوچەکانی دەوروبەری كه‌وتنە ژێر ده‌ستی میلیشیاكانی حه‌شدی شه‌عبی و هێزه‌كانی عێراق، دواتر هه‌ریه‌ك له‌ كۆسره‌ت ڕه‌سوڵ عه‌لی، جێگری یه‌كه‌می سكرتێری گشتیی یه‌كێتی و شێخ جه‌عفه‌ر مسته‌فا، ئه‌ندامی مه‌كته‌بی سیاسی و فه‌رمانده‌ی یه‌كه‌ی 70ی هێزی پێشمه‌رگه‌ی كوردستان، ئاشكرایان كرد كه‌ گرووپێكی نێو یه‌كێتیی نیشتمانیی كوردستان له‌مه‌دا به‌رپرسیارن و ڕێككه‌وتنی ژێربه‌ژێریان له‌گه‌ڵ میلیشیاكانی حه‌شدی شه‌عبی و هێزه‌كانی عێراق كردووه‌ و به‌و هۆیه‌وه‌ سه‌دان پێشمه‌رگه‌ و هاووڵاتی شه‌هید و بریندار بوون و نزیكه‌ی 200 هه‌زار كه‌سیش ئاواره‌ بوون.




باسنیوز