سه‌در سازش ناكات
سه‌در له وه‌ڵامی یه‌كێك له شوێنكه‌وتووه‌كانیدا ئه‌و قسه‌یه‌ی كردووه، كاتێك لێی پرسیوه ئه‌و هه‌واڵانه‌ی باسی په‌یوه‌ندی نێوان ره‌وتی سه‌در و ئه‌مریكا ده‌كه‌ن به‌تایبه‌تی ئه‌وه‌ی له بی بی سی باسكرابوو تا چه‌ند راسته؟.
سه‌در له‌وه‌ڵامدا گوتوویه‌تی: "له تویته‌كانی تویته‌ردا وه‌ڵامی ئه‌و پرسیارانه‌م داوه‌ته‌وه كه ئێمه میلله‌تێكین هیچ كاتێك سازش له‌سه‌ر ئه‌و پره‌نسیپه جێگیرانه ناكه‌ین كه باوه‌ڕمان پێیه‌تی".
پاش سه‌ركه‌وتنی لیستی سائیروون چه‌ند هه‌واڵێك بڵاوكرانه‌وه و باسی درووستبوونی په‌یوه‌ندی نێوان ره‌وتی سه‌در و ئه‌مریكایان ده‌كرد، به‌تایبه‌تی ئه‌وه خرایه روو كه له ساڵی 2007ـه‌وه سه‌در و ئه‌مریكا به‌نھێنی په‌یوه‌ندییان هه‌یه و پاش هه‌ڵبژاردنیش باڵیۆزخانه‌ی ئه‌مریكا له به‌غدا په‌یامێكی به لایه‌نی سێیه‌مدا بۆ سه‌در ناردووه، به‌ڵام ئه‌و به باش و خراپ وه‌ڵامی په‌یامه‌كه‌ی نه‌داوه‌ته‌وه.
پاش ئه‌وه‌ی ساڵی 2003 رژێمی سه‌ددام حسێن رووخێنرا، سوپای مه‌هدی سه‌ر به موقته‌دا سه‌در دژی هێزه‌كانی ئه‌مریكا شه‌ڕیان كردو و سه‌دریش لای ئه‌مریكییه‌كان به كه‌سێكی له یاساده‌رچوو و ئاژاوه‌گێڕ ناوده‌برا.
به‌رده‌وام موقته‌دا سه‌در هێزه‌كانی ئه‌مریكا وه‌ك داگیركار ناوده‌بات و چه‌ندین جار داوای كردووه له‌عێراق بچنه ده‌ره‌وه
K24
