قاسم سوله‌یمانی گه‌یشته به‌غدا
وێباستی "الغد پرێس" بڵاویكردووه‌ته‌وه، سوله‌یمانی له‌گه‌ڵ ته‌واوی لیسته شیعه براوه‌كانی هه‌ڵبژاردنه‌كه كۆده‌بێته‌وه و تاووتوێی پێكهێنانی حكوومه‌تی نوێی عێراق ده‌كه‌ن.
به گوێره‌ی چه‌ند سه‌رچاوه‌یه‌ك كه به وێبسایته‌كه‌یان راگه‌یاندووه، سه‌ردانه‌كه‌ی سوله‌یمانی دوای راگه‌یه‌ندنی ئه‌نجامه به‌راییه‌كانی هه‌ڵبژاردنه له‌لایه‌ن كۆمیسیۆنی باڵاوه، كه به جیاكردنه‌وه و هه‌ژماركردنی 90%ی ده‌نگه‌كان، نه‌خشه‌ی سیاسی و لیسته براوه‌كان روون بوونه‌ته‌وه.
سه‌رچاوه‌كان بۆ ئه‌و وێبسایته عێراقییه، ئاماژه‌یان به‌وه كردووه، سه‌ردانه‌كه‌ی سوله‌یمانی پێشتر رانه‌گه‌یه‌ندراوه و هاوكاته له‌گه‌ڵ ده‌ركه‌وتنی پشتیوانی سعوودیه بۆ هاوپه‌یمانی سائیرونی موقته‌دا سه‌در، كه تا ئێستا له‌پێشه‌وه‌ی لیسته‌كانی عێراقه و به یه‌كه‌م دێت، بۆ پێكهێنانی هاوپه‌یمانێتییه‌كی گه‌وره‌تر له‌گه‌ڵ ئه‌و هێزه سووننانه‌ی دیكه‌ی عێراق، توانیویانه كورسی په‌رله‌مانی مسۆگه‌ر بكه‌ن.
سه‌رچاوه‌یه‌كی نزیكیش له نووری مالیكی، سه‌رۆكی هاوپه‌یمانی ده‌وڵه‌تی یاسا ئاشكرای كردووه، ره‌نگه هاوپه‌یمانێتییه‌ك له چوار لیستی براوه‌ی هه‌ڵبژاردنه‌كان پێكبهێنن.
سه‌رچاوه‌كه ئه‌وه‌شی ئاشكرا كردووه، هاوپه‌یمانێتییه‌كه به سه‌رۆكایه‌تی نووری مالیكی ده‌بێت و هه‌ریه‌ك له لیستی فه‌تحی هادی عامری و هاوپه‌یمانی نیشتمانی ئه‌یاد عه‌لاوی له خۆ ده‌گرێت و كۆبوونه‌وه‌یه‌كیشیان ئه‌نجامداوه.
پێشتریش موقته‌دا سه‌در سه‌رۆكی ره‌وتی سه‌در و لیستی سائیرون، كه یه‌كه‌می عێراقه، رایگه‌یاندبوو، به هیچ شێوه‌یه‌ك هاوپه‌یمانی له‌گه‌ڵ ده‌وڵه‌تی یاسای مالیكی ناكه‌ن.
سه‌در له په‌یامێكیشدا كه دوێنێ له تویته‌ره‌وه بڵاویكردووه‌ته‌وه، ناوی زۆربه‌ی لیسته براوه‌كانی هێناوه، جگه له فه‌تح و ده‌وڵه‌تی یاسا و لیسته‌كه‌ی یه‌كێتی نیشتمانی كوردستان.
پرۆسه‌ی هه‌ڵبژاردنی گشتی ئه‌نجوومه‌نی نوێنه‌رانی عێراق، رۆژی 12ی ئایاری 2018 به‌ڕێوه‌چوو و تا ئێستا له‌سه‌ر ئاستی عێراق سائیرون یه‌كه‌مه.
هه‌ریه‌ك له لیستی فه‌تحی هادی عامری دووه‌م و لیستی نه‌سڕی عه‌بادی سێیه‌م، پارتی دیموكراتی كوردستانیش له سه‌ر ئاستی عێراق چواره‌مه و له‌سه‌ر ئاستی هه‌رێمیش یه‌كه‌مه، هه‌رچی ده‌وڵه‌تی یاسای نووری مالیكیه، له‌سه‌ر ئاستی عێراق له ریزبه‌ندی پێنجه‌مه.
K24 -
