وەزارەتی كۆچ و كۆچبەرانی عێراق رایگەیاند لەوەتەی لەناوچوونی داعشەوە 27 هەزار ئاوارە بە ویستی خۆیان لە توركیا و سووریا گەڕاونەتەوە زێدی خۆیان لە ناوچە ئازادكراوەكانی عێراق لەدەست ڕێكخراوی تیرۆریستی داعش.


ستار نەورۆز گوتەبێژی وەزارەتی كۆچ و كۆچبەرانی عێراق رایگەیاند تا ئێستە 22 هەزار ئاوارەی عێراق لە كەمپی هۆل لە سووریا گەڕاونەتەوە ناوچەكانیان.


پێشتر ئەو 22 هەزار كەسە لە سنووری پارێزگای نەینەوا بە هۆی هێرش و كۆنتڕۆڵكردنی ناوچەكانیان لەلایەن داعشەوە، ئاوارەی سووریا بووبوون و لە كەمپی هۆل نیشتەجێ كرابوون.


كەمپی هۆل دەكەوێتە پارێزگای حەسەكە لە باكووری رۆژهەڵاتی سووریا لە نزیك سنووری عێراق.


ستار نەورۆز بۆ ئاژانسی هەواڵی "ئانادۆڵو"ی توركی، باسی لەوەش كردووە كە تا ئێستە وەزارەتەكەیان گەڕانەوەی پێنج هەزار ئاوارەی عێراقی لە توركیا تۆمار كردووە.


ئاماژەشی بەوەدا كە ئەو ئاوارانەی عێراق دوای باشبوونی رەوشی ئەمنی و كۆنتڕۆڵكردنەوەی ناوچەكانیان بە ویستی خۆیان گەڕاونەتەوە سەر زێدی خۆیان.
bas news-