هه‌رچه‌نده‌ له‌دواى ڕووخانى ڕژێمى به‌عسه‌وه‌ ده‌یان ملیار دۆلار بۆ دروستكردنى قوتابخانه‌ ته‌رخان كراون، به‌ڵام تائێستاش به‌شێكى زۆر له‌ قوتابیانى عێراق، به‌تایبه‌ت له‌ پارێزگاكانى خواروو، له‌ ناو قوتابخانه‌ى گڵ ده‌خوێنن و به‌و هۆیه‌شه‌وه‌، له‌ زستاندا تووشى كێشه‌ى هاتوچۆكردن و سه‌رما و سۆڵه‌ ده‌بنه‌وه‌.


پێشتر به‌رپرسێكى باڵاى وه‌زاره‌تى په‌روه‌رده‌ى عێراق ئه‌وه‌ى ئاشكرا كردبوو، كه‌ له‌ته‌واوى پارێزگاكاندا (به‌ بێ هه‌رێمى كوردستان)، 15 هه‌زار قوتابخانه‌ هه‌ن، به‌ڵام سه‌دان له‌و قوتابخانانه‌ له‌ گڵ دروستكراون و پشتگوێخراون.


ئه‌و به‌رپرسه‌ له‌ لێدوانێكیدا بۆ ماڵپه‌رى (جه‌زیره‌ نێـت) ئاشكراى كردبوو، له‌به‌ر پێویستى ئه‌و ناوچانه‌ به‌ قوتابخانه‌، ناچار له‌ گڵ قوتابخانه‌یان دروستكردووه‌، چونكه‌ تێچووى كه‌مه‌ و له‌ماوه‌یه‌كی كه‌میشدا دروست ده‌كرێت.


له‌باره‌ى بودجه‌ی ته‌رخانكراو بۆ دروستكردنى قوتابخانه‌ له‌ دواى ڕووخانى ڕژێمى به‌عسه‌وه‌ ، ئه‌و به‌رپرسه‌ ڕایگه‌یاند، كه‌ له‌ ڕاستیدا پاره‌یه‌كی زۆر ته‌رخان كراوه‌ و به‌ ده‌یان ملیار دۆلار مه‌زه‌نده‌ ده‌كرێت، به‌ڵام به‌ بێ ئه‌وه‌ى بتوانرێت ئه‌و قوتابخانانه‌ بڕوخێندرێن و قوتابخانه‌ى مۆدێرن له‌ وڵاتێكى ده‌وڵه‌مه‌ند به‌نه‌وتى وه‌ك عێراق، دروست بكرێن.
bas news-