داعش لەسەر رێگای کەرکووک- بەغدا بازگە دادەنێت
بەپێی زانیارییەکان، لە دوو رووداوی جیادا لەسەر رێگای کەرکووک- بەغدا، 10 هاووڵاتیی کوژراون و پێنجی دیکەش لەناو ئۆتۆمبێلەکەیانەوە، سووتێندراون.
هەروەک میدیا عێراقییەکان باسی دەکەن، ئەو دوو رووداوە شەوی یەکشەممە 11/3/2018 لە نزیک بازگەکانی داعش و بە دەستی چەکدارانی ئەو رێکخراوە تیرۆریستییە، روویان داوە.
ئەو پێنج کەسەی سووتێندراون، پێکهاتبوون لە پیاوێک و هاوسەرەکەی، دوو منداڵ و برایەکی ئەو پیاوە و هەموویان دوای کوژرانیان بە گوللە، لەناو ئۆتۆمبێلەکەیانەوە سووتێندراون.
دانانی بازگە لەسەر رێگای بەغدای پایتەختی عێراق لەلایەن داعشەوە لەکاتێک دایە، کە حەیدەر عەبادی، سەرۆک وەزیرانی عێراق لە مانگی 12/2017 رایگەیاند، هێزەکانی وڵاتەکەی بەسەر داعشدا سەرکەوتن و ئەو رێکخراوە تیرۆریستییە لە عێراق کۆتایی هات.
باسنیوز
