داعش ده‌گه‌ڕێته‌وه بۆ مووسڵ و زنجیره‌یه‌ك كردارى كوشتن ئه‌نجام ده‌دات
ڕۆژنامه‌كه بڵاوی كردووه‌ته‌وه، كه پارێزگاى نه‌ینه‌وا، به‌تایبه‌تى شارى مووسڵ، له‌سه‌ره‌تاى ئه‌مساڵه‌وه گه‌ڕانه‌وه‌ى داعشى به‌خۆیه‌وه بینیوه و زنجیره‌یه‌ك تاوانى كوشتن ئه‌نجام دراوه، به‌تایبه‌ت كوشتنى موختاره‌كان.
ئه‌وه‌ش خراوه‌ته‌ڕوو، كه له به‌رى چه‌پى شاره‌كه، دوو موختار كوژران، ئه‌مه جگه له نماشێكى سه‌ربازیی داعش له خۆرئاواى پارێزگاكه.
ڕۆژنامه‌كه له زارى چالاكوانه میدیاییه‌كانه‌وه له شارى مووسڵ، ئاشكراى كردووه، كه: "موختارى گه‌ڕه‌كى ئینتیساڕ له 7ى كانوونى دووه‌م كوژرا، له‌هه‌مان گه‌ڕه‌ك دوو سه‌رباز كوژران، هاوكات له گه‌ڕه‌كى سۆمه‌ر دوو ئه‌ندامى هێزه ئه‌منییه‌كان له‌سه‌ر ده‌ستى چه‌كدارانى داعش كوژران".
هه‌روه‌ها موختارى ڕه‌شیدییه له ڕۆژى دواتردا له‌سه‌ر ده‌ستى چه‌كدارانى داعش له گه‌ڕه‌كى عه‌ره‌بیى نزیك له ڕه‌شیدییه، كوژرا.
ڕۆژنامه‌كه له‌سه‌ر زارى مه‌زاحم حویت، گوته‌بێژى عه‌شیره‌ته عه‌ره‌به‌كانى پارێزگاكه، بڵاویكردووه‌ته‌وه، كه بۆ پاراستنى گیانى هاووڵاتییان، پێویسته هێزه ئه‌مریكییه‌كان دۆسیه‌ی ئه‌منى نه‌ینه‌وا به‌ده‌سته‌وه بگرن.
باسنيوز
