Fîlmê bi navê Barê Giran ku ji aliyê derhênerê Kurd Yilmaz Ozdîl ve hatiye berhemanîn di Festîvala Fîlm a Navdewletî ya Enqerê de hêjayî xelata Baştirîn Kurte Fîlmê hat dîtin.

Çîroka Barê Giran li ser jiyana kesê bi navê Avdel e ku hewl dide debara jiyana malbata xwe û xwîşk û biraziyê xwe dabîn bike û li Mêrdînê hatiye pêkanîn.

Barê Giran ku ji aliyê derhênerê Kurd Yilmaz Ozdîl ve hatiye berhemanîn di 31emîn Festîvala Fîlm a Navdewletî ya Enqerê de beşdar bû û hêjayî baştirîn kurte fîlm hat dîtin.

Yilmaz Ozdîl ji Rûdawê re ragihand, “Ev 22emîn xelat e ku Barê Giran wergirt. Barê Giran ji 6 festîvalan di 4an de xelat wergirt. Em kêfxweş in. Derket holê ku fîlmek Kurdî dikare li Tirkiyê jî û di qada navdewletî de jî xelat werbigire.”

Ozdîl diyar jî kir ku wan di festîvalên Stenbol, Îzmîr û Enqerê de xelat wergirtin û ragihand ku Barê Giran heta niha ji bo 87 festîvalên navdewletî hatiye qebûlkirin û herwiha got jî, “Du roj berê di Festîvala Fîlm a Navdewletî ya Navarra li Spanyayê jî xelata Melitona (baştirîn xelata dîtbarî) wergirt.”

Barê Giran 23ê Gulanê jî li bajarê Barcelona yê Spanyayê di Festîvala Fîlm a Navdewletî de baştirîn xelata kurte fîlm wergirt.

Herwiha Barê Giran di Festîvala Fîlm a Navdewletî ya Duhokê ku 9-16ê Îlona 2019an birêve çûbû xelata kurte fîlm, di 10emîn Festîvala Fîlmên Kurt a Medya Nû ya Navdewletî li Çînê jî xelata King Bonn wergirtibû.

Derhêner Yilmaz Ozdil sala 1979an li Gevera ser bi Colemêrga Bakurê Kurdistanê ve ji dayîk bû û sala 2002an ji Peymangeha Ragihandinê ya Zanîngeha Enqerê der çû û heta niha wek derhêner beşdarî di gelek festîvalên navdewletî de kiriye û gelek xelat wergirtine.

Rudaw