Dibêje rejîm ji nîşkave ketiye nava kemîneke metirsîdar de.

Rayedarekî rejîma Îranê ku, tê gotin kesekî nêzî Elî Xamneyiye û şêwirmendê wî yê karûbarên ewlekariye, ji Iranviar re ragihandiye ku, Xamneyî û rayedarên din yên rejîmê ji rewşa niha ya Îranê gelek ditirsin û dibêjin em bi nexafilî hatine girtin.

Ev rayedarê Îranî diyar kiriye ku, Xamneyê ferman bi spaha Pasdaran kiriye daku, bi tevahiya hêz û karînên xwe dest bi lêdana xwepîşanderan bike û dawî bi xwepîşandanan bîne.

Ev rayedarê han herwiha eşkere kiriye ku, eger rewş wisa berdewam be, egera çê bûna komkujiyên gelek mezin jî heye.

Weke tê zanîn ev 9 roje li seraserê Îranê jiber kuştina keça Kurd Jîna Emînî ji aliyê hêzên rejîmê ve xwepîşandanên mezin hene û heta niha hêzên rejîmê zêdetir ji 50 kesan kuştine.