Li rojavayê Kurdistanê yekemîn ajansa kurdî ya bi navê Hawar dest bi weşanê dike. Berpirsekî ajansê jî ji Rûdawê re diyar kir ku wê ajans ligel zimanê kurdî, bi 4 zimanên biyanî weşanê bike.

Piştî serhildanên navxweyî yên li Sûriyê re, gelê kurd jî li rojavayê Kurdistanê piraniya bajar û bajarokên kurdî xistin di bin bandora xwe de. Kurdan li rojava di warê çapemeniyê de jî gavên giring avêtin. Li rojavayê Kurdistanê yekemîn ajansa kurdî ya bi navê Ajansa Nûçeyan a Hawar (ANHA) dest bi weşanê dike.

Berpirsê ajansa ANHA Ednan Mistefa derbarê xebat û amadekariyên ajansê de ji Rûdawê re axivî. Mistefa wiha got: “Ajans di pêvajoya amadekariyê de ye û hê aliyên wê yên teknîkî temam nebûne. Ajans wê taybet ji bo rojavayê Kurdistanê be, lê wê nûçeyên giştî, yê parçeyên din ên Kurdistan û cîhanê jî belav bike.”

Ednan Mistefa destnîşan kir ku çapemeniya kurdî di sedsala 21an de pêngavên mezin avêtiye û wiha pêdeçû: “Ajansa Hawar jî wê di çarçoveya çapemeniya azad de ne xeleka despêkê û ne jî ya dawî be. Ev ajans di encama tekoşîna xebatekî bi salan de tê avakirin.”

Rêveberê Ajansa Hawar Mistefa derbarê armancên ajansê de jî wiha got: “Armanca wê ya serekî ew e ku bûyer û pêşketinên li rojavayê Kurdistanê di warê civakî, siyasî, aborî û hunerî de tên jiyankirin, bi raya giştî re parvebike ye. Armanceke din jî ya ajansa me ew e ku gelê kurd bi cîhanê bide naskirin e.”

Mistefa bilêv kir ku wê navenda ajansa Hawar li rojavayê Kurdistanê be û wiha got: “Wê ajansa Hawar dîmen û wêneyan jî belav bike. Ligel vê yekê wê ajansa me bi zimanê kurdî, erebî, rûsî, inglîzî û fransî weşanê bike.”

Ednan Mistefa destnîşan kir ku wê ANHA heta berî Newrozê dest bi weşana xwe bike.

Li ser pirsa navê Hawar ji kuderê tê, rêveberê ANHAyê wiha got: “Ji ber ku ajanseke taybet bi rojavayê Kurdistanê ye, navê xwe ji çiyayê Hawar ê li herêma Efrînê digre. Herwiha wekî kevneşopiya kovara Hawar e.”

Kovara Hawar:

Hawar yekemîn kovara kurdî ya bi tîpên latînî bû. Di kovara Hawar de yekem car di dîroka kurdan de zimanê kurdî bi tîpên latînî hatiye nivîsandin û ji ber vê yekê cihekî taybet ê kovarê di pêşveçûn û standartkirina zimanê kurdî de heye. Yekemîn hejmara kovara Hawar di 15'ê gulana 1932'an de derket û heta 15'ê tebaxa 1943'an 57 hejmar derketine. Cîhê xebata û weşandina kovarê paytexta Sûrîyê Şam bû. Hawar mehê du caran derdiket. Kovara Hawar, kovarekî polîtîk û wêjeyî bû, ji aliyê Celadet Elî Bedirxan ve dihate derxistin. Di kovarê de bi giranî lêkolîn, çîrok û helbestên bi kurdî, ji edebiyata kurdî nivîsên bijartî dihatin weşandin. Bi vî awayî Hawar di wêje û mijara zimanî da bibû ekolek û heta sala 1943'ê weşana xwe berdewan kir. Celadet di hejmara pêşîn û di rêzên pêşîn da wiha got: “Hawar dengê zanînê ye. Zanîn xwenasîn e. Xwenasîn ji me re rêya felat û xweşiyê ye.”

Rudaw