پەیامی سەرۆک بارزانی بۆ کۆچی دوایی خاتوو جۆیس بلەو
بەناوی خودای بەخشندە و میهرەبان
بەداخێكی زۆرەوە هەواڵی كۆچی دوایی نووسەر و زمانناس و زانای فەڕەنسی پڕۆفیسۆر خاتوو (جۆیس بلەو)ـم پێ گەییشت. خاتوو (جۆیس بلەو) پاڵپشت و دۆستێكی گەورەی گەلی كوردستان بوو كە خزمەتێكی زۆری پێشكەشی زمان و ئەدەبی كوردی و ئەنستیتوی كوردی لە پاریس كردووە و حەقی لەسەر هەموومان هەیە و پەرۆشی و زەحمەتەكانی بۆ خزمەتكردنی كورد لەبیر ناكرێن.
پرسە و سەرەخۆشیی خۆم ئاراستەی خانەوادە و كەسوكار و ئاشنا و هاوكارانی خوالێخۆشبوو خاتوو (جۆیس بلەو) و هەموو نووسەر و زمانناسانی كورد دەكەم و خۆم بە هاوبەشی خەمیان دەزانم.
ڕۆحی خوالێخۆشبوو خاتوو (جۆیس بلەو) شاد و یادی هەمیشە بەرز بمێنێت.
مسعود بارزانی
25ی تشرینی یەكەمی 2024
