لە ئەنجامی ئاگرکەوتنەوەیەكی گەورەی دارستانەکانی باشووری ڕۆژهەڵاتی ئوسترالیا زیاتر لە ١٤ هەزار هێکتار زەوی سووتا و بووە خۆڵەمێش.

زیاتر لە 14 هەزار هێکتار زەوی بەهۆی ئاگرکەوتنەوەی دارستانەکانی ویلایەتی ڤیکتۆریا لە باشووری ڕۆژهەڵاتی ئوسترالیا کە هێشتا کۆنترۆڵ نەکراوە، بووەتە خۆڵەمێش.

بەپێی هەواڵێکی ڕۆژنامەی « The Age »، هەزار كارمەندی ئاگرکوژێنەوە ڕەوانەی ویلایەتەکە کراون بۆ کۆنتڕۆڵکردنی ئاگری دارستانەکان.

جاسینتا ئالن، سەرۆکی ویلایەتی ڤیکتۆریا لە پۆستەکەیدا لە هەژماری خۆی لە تۆڕە کۆمەڵایەتییەکان نووسیویەتی: زیاتر لە 14 هەزار هێکتار زەوی لەم ئاگرکەوتنەوانەدا سووتاوە، هەروەها لە ناوچە جیاجیاکان هۆشداری داوە كە ناوچەکە چۆڵ بکەن.

دەسەڵاتدارانی ئوسترالیا ڕایانگەیاند، بای بەهێز ئاگرەکەی بەرەو باکووری ڕۆژهەڵات پاڵنا و شارۆچکەکانی دەوروبەری شاری بوفۆر مەترسی ئاگرکەوتنەوەیان لەسەرە.

 

 

گوڵان: سەردار خەلیل