باڵیۆزخانه‌ی ویلایه‌ته‌ یه‌كگرتووه‌كانی ئه‌مه‌ریكا له‌ به‌غدا، به‌هۆی به‌رزبوونه‌وه‌ی ئاستی گرژییه‌كان له‌ عێراق داوا له‌ هاووڵاتیانی ده‌كات یان سه‌ردانی عێراق نه‌كه‌ن یان هۆشیاربن و چوار خاڵ وه‌ك رێوشوێنی سه‌لامه‌تی په‌یڕه‌و بكه‌ن.

به‌گوێره‌ی بڵاوكراوه‌یه‌كی باڵیۆزخانه‌كه‌ كه‌ رۆژی 12/5/2019 ئاراسته‌ی هاووڵاتیانی ئه‌مه‌ریكا كراوه‌، داوایان لێده‌كات بۆ پارێزگاریكردن له‌ خۆیان ره‌چاوی ئه‌م چوار خاڵه‌ بكه‌ن.

1- گه‌شت بۆ عێراق نه‌كه‌ن.

2- خۆیان له‌و شوێنانه‌ دوورخه‌نه‌وه‌ كه‌ به‌ ناوچه‌ی گردبوونه‌وه‌ی ئه‌مه‌ریكییه‌كان ناسراون.

3- ناسنامه‌ی خۆیان ئاشكرا نه‌كه‌ن.

4- ئاگاداری خۆیان و ده‌وروبه‌ریانبن.

هه‌روه‌ها داوا له‌ هاووڵاتیانی ئه‌مه‌ریكی كراوه‌، په‌یوه‌ندییان له‌گه‌ڵ باڵیۆزخانه‌ی ئه‌مه‌ریكا هه‌بێت له‌ كاتی هه‌ر رووداوێكی له‌ناكاودا.

به‌هۆی زیادبوونی گرژییه‌كانی نێوان ئه‌مه‌ریكا و ئێران و ئه‌و بارودۆخه‌ نوێیه‌ی پاش سزادانی ئێران هاتووه‌ته‌ ئاراوه‌ و ناردنی كه‌شتیگه‌لیی جه‌نگی و فڕۆكه‌ی زه‌به‌لاحی B-52 و بڕیاری بڵاوكردنه‌وه‌ی زیاتری سه‌كۆی مووشه‌كی پاتریۆت و باڵاده‌ستی ئێران له‌ عێراق، ئه‌مه‌ریكا مه‌ترسی بۆ دروستبووه‌ هاووڵاتیانی له‌ عێراق و ناوچه‌كه‌ ببنه‌ ئامانجی توندوتیژییه‌كان.

به‌گوێره‌ی چه‌ند راپۆرتێكی میدیایی و هه‌واڵگریی، پێده‌چێت عێراق ببێته‌ خاڵی به‌ریه‌ككه‌وتن و رووبه‌ڕووبوونه‌وه‌ی نێوان واشنتن و تاران، چونكه‌ به‌شیكی ئه‌و گرووپه‌ چه‌كدارانه‌ی حه‌شدی شه‌عبی كه‌ له‌ ئێرانه‌وه‌ نزیكن، ئه‌مه‌ریكا له‌ لیستی تیرۆر دایناون و زانیاری ئه‌وه‌ش بڵاوبووه‌ته‌وه‌‌ كه‌ میلیشیاكانی نزیك له‌ ئێران پلان بۆ هێرشكردنه‌ سه‌ر بنكه‌ سه‌ربازییه‌كانی ئه‌مه‌ریكا داده‌ڕێژن.






K24 -