îro bi armanca ji nêzîk dîtina topbarana Îranê li ser sînûrên herêma Kurdistanê û berhevkirina raporekê, lijneyek ji perlemana Îraqê wê biçe navçeyên sînûrî yên Herêma Kurdistana Îraqê.

Şiwan Mihemed Teha Endamê Lijneya Asayîş û Parastinê ya Parlamentoya Îraqê û Endamê Demkî yê Şopandina Bordomankirinên Sînûrê Herêma Kurdistanê ji Rûdawê re got: “Biryare em îro biçin navçeyên ser sînûr ên Herêma Kurdistana Îraqê ku ji aliyê Îranê ve hatîn bordoman kirin. Ji bo em ji nêz ve raporekê derbarê zerer, jiyan û rewşa wan navçeyan amade bikin. Piştre jî bibin parlamenetoya Îraqê û ew jî wê bi armanca çareserkirinê wekî pêşniyarekê pêşkêşî Hikûmeta Îraqê bikin.”

Şiwan Mihemed di berdewama axaftinên xwe de dibêje: “Ev çend care cîranê me Îran sînûrên Herêma Kurdistana Îraqê topbaran dike û ev kar jî binpêkirina serweriya xaka Îraqê ye. Li gor pêwer û yasayên navnetewî pêwîste welatên cîran rêzdariyê li sînûrê hev bigrin.”

Şiwan Mihemed derbarê çareseriya topbaran û pirsgirêkên ser sînûr de got: “Ev demek pirsgirêkên Îraqê yên li gel cîranên xwe heye, lê ji ber pirsgirêkên navxwe nakeve ser çareserî û yekalîkirina pirsgirêkên ser sînûrî. Ji bilî vê yekê neku di warê sînûrî de, belkî di warê rêveberî û hikûmî de jî lewaze. Lê pêwîste Îraq dû rêyan bigre pêşiya xwe, yan bi têkiliyên dû alî pirsgirêkê çareser bike yan jî hinek yasa û rêbazên navnetewî li ber çavan bigre.”

Rûdaw