Serokê Herêma Kurdistanê Mesûd Barzanî di civîna duhî ya ligel serkirdeyên aliyên siyasî yên Kurdistanê de bal kişande ser biryara vekişîna Tevgera Goran ji Fraksyonên Kurdistanî û biryar hat dayîn lijneyek bê pêkanîn bo gotûbêjan ligel wê lîstê bike da dîsan vegere.

Derbarê beşdarînekirina nûnerên Tevgera Goran di civînên Hewlêr û Bexda de Barzanî got: ‘Amadenebûna wan cihê mixabiniyê ye û ev helwêsta wan jî helwêsteke ji nişka ve bû, bi taybetî di van rojan de ku pêwistiya me hemûyan bi yekrêziyeke zêdetir heye’.

Serokê Herêma Kurdistanê Mesûd Barzanî wiha axifî: ‘Di civîna berê de min ji wan re gotibû ger her pirsgirêkek heye amade me çareser bikim û guh li nerîn û pêşniyarên wan bigrim’.

Her di wê civînê de hêz û aliyên siyasî yên Kurdistanê û şanda danûstandinan a Îtîlafa Fraksyonên Kurdistanî ligel ku derbarê helwêsta Goran de nîgeraniya xwe anîn ziman, biryar dan lijneyek bê pêkanîn bo gotûbêjan ligel wê lîstê bike da dîsan vegere nav Îtîlafa Kurdistanî.