Serokê herêma kurdistanê Mesûd Barzanî, bi amadebûna serokê wezîran Berhem Salih û cihgirê wî û wezîrê dadwerîyê Re`ûf Reşîd û şîretkarê serokê herêma kurdistanê Azad Izzeddîn Mela Fendî, kombûnek bi dozdarên giştîyên herêma kurdistanê re saz da.

Di destpêka evê kombûnê de serokê herêma kurdistanê behsa rola dozdarên giştî kir û ragihand, ku karê dozdarê giştî karekî pîroz e.
Serokê herêma kurdistanê got: karê dozdarê giştî pîroz e.. her ji nûneratîya mafên giştî yên li herêma kurdistanê û paraztina berjewendîyên bilind û bilindkirina gilînameyên giştîyên li dijî kesên dijberên qanûnê bigire û heta bigihêje paraztina samanên giştî, xêzanê, zarokan û nûgihayan.
Serokê herêma kurdistanê tekez jî kir, ku dozdarên giştî dikarin li angora erkên xwe, bibin hevkarên serekî û di rûyê gendelîyê û bi karanîna xeraba desthilatdarîyê de birawestin û beşdarîyê di prosesa çaksazîyê de bikin.
Serokê herêmê tekez jî kir, ku mebesta wan ew e, ku ev kiyanê han bibe kiyanekî dezgehîn û ji ber evê çendê, bi hemû şiyanên xwe ve ew pîkolan dikin, da ku rola dozdarê giştî çalak be û da ku xelk dilhêsayî bin, ku dezgeheka qanûnî heye û bergirîyê di ber mafên wan de dike.
Di bareya rola qanûnê de ya di nava civakê jî de serokê herêmê got, ku kes ji qanûnê mezintir nîne û divê hukûmeta herêma kurdistanê bi kiryar, evî dirişmî bi cih bihîne û pîkolan bike, da ku qanûn û giyanê paraztina qanûnê bêtir bihên çesipandin.
Di bareya serxwebûna dadwerîyê jî de serokê herêma kurdistanê got, ku dadwerî serbixwe ye û ne alîgir e û ragihand, ku hêza her welatekî di dezgeha wî ya dadwerîyê de ye û ji ber evê yekê, divê ev dezgeha han karyartir bibe, rêzgirtin ji biryarên wê re hebe û hemû alî jî, di ber bi cihanîna ewan biryaran de berpirs in.
Piştî hîngê serokê hukûmeta herêma kurdistanê Berhem Salih gotarek pêşkêş kir û ji bo berdestkirina evê derfetê, spasîya serokê herêma kurdistanê kir. Berhem Salih da nîşandan, ku dema serokê herêma kurdistanê wî û cihgirê wî Azad Berwarî rasipart, ku ew kabîneya şeşem pêk bihînin, tekezî li ser karyarkirina rola dozdarê giştî kir û di evê kombûna han jî de, serokê herêmê dîsan giringîyê dide evê tivêja bi bandor.
Di dawî de, serokê dozdarîya giştî, cihgirê wî û endamên dozdarîya giştî, çend pêşinyar pêşkêşî serokê herêma kurdistanê kirin. Ji wan jî; serrastkirina qanûna dozdarîya giştî ya hejmar 159 a sala 1979 a serrastkirî, yan derxistina qanûneka nû ya dozdarîya giştîya herêma kurdistanê, serxwebûna dozdarîya giştî di biwarê rêvebirî û darayî de û hinek pêşinyarên din bûn. Hemû pêşinyar jî li nik serokê herêma kurdistanê giring bûn.