Serokwezîrê Herêma Kurdistanê Mesrûr Barzanî bi rêya çend pêwendiyên telefonî, cejna Remezanê li hejmarek zarokên sêwî û xizmên wan pîroz kir.

Piştî ku di meha Remezana pîroz de Dezgeha Xêrxwazî ya Barzanî di çarçoveya projeya Çavdêriya Azîzan de bi qasî 13 milyon dolar weke diyarî û eydanî bi ser zêdetirî 15 hezar zarokên sêwî de li seranserê Herêma Kurdistanê dabeş kir, Serokwezîrê Herêma Kurdistanê Mesrûr Barzanî destxweşî li rêveberên projeya Çavdêriya Azîzan a Dezgeha Xêrxwazî ya Barzanî kir, ku bi alîkariya Heyva Sor a Îmaratê û hinek sermayedarên Kurdistanê hat encamdan.

Serokwezîr Mesrûr Barzanî hêviya xwe anî ziman ku ev proje berfirehtir bibe, ku hemû zarokên sêwî û azîz, bi taybetî zarokên şehîdan li xwe bigre. Herwiha ji bilî alîkariya madî, aliyê perwerdeya zarokan jî li xwe bigre û zarok bi hizra niştimanperwerî û mirovdostî werin perwerdekirin.

Piştre Serokwezîr bi rêya çend pêwendiyên telefonî, cejna Remezanê li hejmarek zarokên sêwî û xizmên wan pîroz kir.