Şirnex jî ket asta parêzgehên herî metirsîdar
Dema Wezareta Tendirustî ya Tirkiyê yekem car nexşeya Covid-19ê ya parêzgehan ragihand, parêzgeha Şirnexê ya Bakurê Kurdistanê di asta parêzgehên ne metirsîdar de û rengê şîn bû, lê li gor amarên dawî, di pêketina bi Covid-19ê de, ew jî ket asta parêzgehên herî metirsîdar û rengê wê hat guhertin.
Li gor amaran, li parêzgeha Şirnexê, di navbera 17-23ê Nîsanê de ji 100 hezar kesan 55.04 kes bi Covid-19ê ketine. Bi vê rêjeyê Şirnex jî bû bajarê herî metirsîdar di pêketina bi Covid-19ê de. Derbarê zêdebûna pêketiyan de welatiyên parêzgehê xemgîniya xwe anîn ziman û banga pêbendbûna tedbîrîn tendirustiyê dikin. Welatî dibêjin ew ji vê rewşê nîgeran in.
Amarên pêketiyên Covid-19ê (li gor ji 100 hezar kesan) di navbera 17-23ê Nîsanê de li hinek parêzgehên din yên Bakurê Kurdistanê jî wiha ne: Amed (143,60), Riha (104,24), Wan (104,49), Mêrdin (95,00), Bedlîs (186,33), Êlih (182,50), Muş (153,00), Colemêrg (150,79), Sêrt (123,84).
Li Tirkiye û Bakurê Kurdistanê di 24 saetên dawîn de 43 hezar û 301 pêketiyên nû yên vîrusa coronayê hatin tomarkirin û herwiha 346 kes jî bi coronayê jiyana xwe ji dest dan.
Hejmara kesên ku heta niha li Tirkiyê û Bakurê Kurdistanê bi vîrusa COVID-19 ketine, gihîştiye 4 milyon û 710 hezar û 582 kesan û 39 hezar û 57 kesan jî canê xwe ji dest dane, herwiha heta niha 4 milyon û 167 hezar û 263 kes jî ji vîrusê baş bûne.
Rudaw
