Serok Mesûd Barzanî ji bo koça dawiyê ya Berdevkê Fraksiyona PDKê li Encûmena Nûnerên Iraqê Aram Baleteyî peyameke sersaxiyê belav kir.Berdevkê Fraksiyona Partiya Demokrat a Kurdistanê (PDK) li Parlamentoya Iraqê Aram Nacî Baleteyî ji ber vîrûsa Koronayê, îro li nexweşxaneyeke Duhokê canê xwe ji dest dabû.

Serok Barzanî di peyama xwe ya sersaxiyê de got: “Diktor Aram xortekê xwedî bawerî û jêhatî û ji malbateke niştimanperwer bû û erkên xwe dilsozane bi cîh digihandin.”

Deqa peyama Serok Barzanî:

Bi xemeke mezin ve min nûçeya koça dawî ya Dr. Aram Baleteyî û Endamê Encûmena Nûnerên Iraqê û Peyvdarê Fraksiyona PDK li Encûmena Nûnerên Iraqê bihîst. Dr. Aram xortekê xwedî bawerî û jêhatî û ji malbateke niştimanperwer bû û erkên xwe dilsozane bi cîh digihandin.

Pirse û sersaxiyên xwe pêşkêşî malbat û kesûkar û hevalên xwedêjêrazî Aram Baleteyî û Endamên Fraksiyona PDK dikim û xwe bi hevbeşê xema wan dizanim. Ji xwedayê mezin hêvîdar im giyanê xwedêjêrazî bi behişta fireh şad bike û hedar û aramiyê bi hemû aliyek bibexşe.

K24