Serokê Herêma Kurdistanê Nêçîrvan Barzanî di peyamekê de hêviya serkeftinê ji Joe Biden û cîgira wî re xwest ku îro dest bi kar kirin û got, “Em dixwazin di îdareya nû de kar li gel hevrêyên xwe bikin.” Serokwezîr Mesrûr Barzanî jî “germtirîn pîrozbahî” li Biden û Harris kirin.

Piştî destbikarbûna Joe Biden wek Serokê Amerîkayê, serkirdeyên cîhanê bi şêweyên cuda pîrozbahiyên xwe arasteyî Biden kirin. Serkirdeyên Herêma Kurdistanê jî pîrozbahî li Biden kirin û di erka wî ya nû de serkeftin jê re xwestin.

Serokê Herêma Kurdistanê Nêçîrvan Barzanî li hejmara xwe ya Twitterê peyamek belav kir û got, “Li ser navê Herêma Kurdistanê ez pîrozbahiyê li Serok Joe Biden û cîgira wî Kamala Harris dikim bo boneya destbikarbûna wan a dîrokî. Ez hêviya serkeftinê bo wan dixwazin di serkirdayetîkirina gelê Amerîkayê û ez bi hêvî me, em di îdareya nû de kar li gel hevrêyên xwe bikin.”

Hevdem Serokwezîrê Herêma Kurdistanê Mesrû Barzanî jî li hejmara xwe ya Twittterê peyamek belav kir û got, “Ez germtirîn pîrozbahî li Serok Joe Biden û cîgira wî Kamala Harrîs dikin. Em bihêvî ne ji nîzk ve kar li gel we bikin bo bihêzkirina hevpeymaniya di navbera Hikûmeta Herêma Kurdistanê û Amerîkayê û dilniyayî bo herêmê.”

Îro Çarşemê, 20/01/2021, di merasîmeke taybet de Joe Biden li Kongrêsa Amerîkayê sonda yasayî xwar û bi fermî bû 46emîn Serokê Amerîkayê.

Joe Biden di yekem gotara xwe de got, “Îro roja Amerîkayê ye, îro roja demokrasiyê ye, roja hêvî û dîrokê ye. Em careke din fêr bûn ku demokrasî binirx e.”

Berî Biden, Kamala Harris jî wek Cîgira Serok sonda yasayî xwar û bû yekem jin di dîroka wî welatî de ku ew post wergirtiye.

Rudaw