خەمۆكی Depression نەخۆشییەكی دەروونیی باو و ئاڵۆزە، كاریگەری دەكاتە سەر بیركردنەوە، مەزاج، لەگەڵ ڕەفتاری ڕۆژانە. خەمۆكی باوە لە دوا ساڵەكانی نەوجەوانی و سەرەتاكانی تەمەنی پێگەیشتندا، ئافرەت دوو هێندەی پیاو ئەگەری تووشبوونی بە خەمۆكییان زیاترە، كە لەوانەیە پەیوەندی بە هۆرمۆنەكانەوە هەبێت. گەلێك هۆكار و گەلێك ڕیسك بەیەكەوە هاندەرن بۆ تووشبوون بە خەمۆكی، بۆنموونە جینەكان(بۆماوە)، هۆكاری بایۆلۆژی، هۆكاری دیمۆگرافی، دەروبەر و ژینگە، لەگەڵ هۆكارە دەروونییەكان ڕۆڵیان لە تووشبووندا هەیە، بۆنموونە: نەخۆشیی درێژخایەنی جەستەیی وەكو شێرپەنجە، گرفتەكانی كۆئەندامی دەمار وەكو جەڵتەی مێشك یان نەخۆشیی پاركینسۆن، دووگیانی و منداڵبوون، زەبر بۆ ناوچەی سەر، ئەلكهول و بەكارهێنانی دەرمانە هۆشبەرەكان، پەستی و سترێسی درێژخایەن، مردنی كەسی نزیك و خۆشەویست، جیابوونەوەی خێزانی، لەدەستدانی كار و پیشە، كارەساتی سرووشتیی وەكو بوومەلەرزە، ئاگر یان لافاو، هەژاری و ناجێگیریی باری ماددی، ڕەگەزپەرستی Racism، بەسەرهات یان كارەساتی گەورە، بەدمامەڵە Abuse و توندوتیژی، هەروەها لاوازی یان نەبوونی پاڵپشتیی كۆمەڵایەتی.