بەهار و نەورۆز و زیرەك

بەهار و نەورۆز و زیرەك

بۆ هەر بۆنە و بیرەوەرییەك، دانراوێكی هونەری هەیە، جا چ بە باری گوزارشتە، یان هاندان، یان پیاهەڵدان، یانیش تامەزرۆیی و خۆشی و شادی. لە كوردەواریی خۆماندا، ئەو دەمانەی باسی داستان و شۆڕش و جوامێرییە، دەیان لاوك و حەیران دەماودەم گوتراون و دەگوترێنەوە، بۆ داستانی ئەوینی هەروا دەیان حەیران و لاوك، بۆ بۆنەی ئایینی ستایش و مەقام گوتراون، كاتێ باسی ڕاپەڕین دەكرێت سروودی شۆڕشگێڕی، كاتێ بەهار دێ هەر لە دەستپێكەوە، واتە لەگەڵ پشكوتنی یەكەم چڵەنێرگز و هاتنی نەورۆز، ئیدی شیعرە بەرزەكەی پیرەمێرد بە دەنگە زوڵاڵەكەی هونەرمەندی بلیمەتی گۆرانیی كوردی (حەسەن زیرەك) دەبێتە سەرمەشقی نەورۆز.

بەهار و نەورۆز و زیرەك

ئامادەكردنی/فەرهەنگ غەفوور

نەورۆز و ئاگركردنەوە و یادەوەرییەكە بەبێ شاكاری (ئەم ڕۆژی ساڵی تازەیە) بە دەنگ و چریكەی زیرەك، وەك ئەوە وایە نە ئاگر كرابێتەوە و نە نێرگز پشكووتبێ و نە بەهار هاتبێتەوە و نە وەرزی سەیران و گەشت و هەڵپەڕكێ و خۆشی بێت، بۆیە میلۆدیی نەورۆز بە دەنگی زیرەك بووە بە ناسنامەیەك بۆ ئەو بۆنەیە. ئەوەش دەزانین كە زۆر هونەرمەندی دیكە ئەو بەرهەمەیان گوتووەتەوە، یان سروودی دیكەیان لەسەر نەورۆز لە شیعری شاعیرانی كورد كردووە بە دەستپێك بۆ هاتنی بەهار، بەڵام هیچ كامیان چ بە شیعر، چ بە ئاواز، چ بە دەنگ و گوتن و چ بە یادەوەرییش لە زیهنی تاكی كورددا نەیانتوانیوە جێی ئەو ئاوازە بگرنەوە، كە لە شیعری پیرەمێرد و لە ئاوازی گەورە هونەرمەندی نەمر (قادر دیلانە) و بۆ یەكەم جار بەدەنگی هونەرمەند و شاعیری گەورەی گەلەكەمان (حەمە ساڵح دیلان)ی نەمر گوتراوە و، دواتر هونەرمەندی گەورە حەسەن زیرەك بەدەنگی خۆی پەخش و بڵاوی كردووەتەوە.

بەهار و نەورۆز و زیرەك

ئێمە ئەم ڕۆژانە كە لە ناو بۆنەكانی ئادار و نەورۆزداین، ئەم مانگە كە پڕاوپڕە لە یادەوەریی تاڵ و شیرین، لە سەركەوتن و مەرگەسات، لە شانازی و شادی و خەم و ئومێد و حەسرەت، ئەم مانگە كە كۆتاییەكەی بە هاتنی بەهار و نەورۆز بەسەر سەرماوسۆڵە و خەم و مەینەتدا سەردەكەوێ، لە خۆڕا نەبووە و داستانێكی گەورەی ڕاپەڕین و مانەوەی كورد بووە بەرامبەر بە دوژمنەكەی و، دواتر لە مێژوودا لە شوێنكاتی جیاجیا خۆی دووبارە كردووەتەوە، تا لە ڕاپەڕینی ئاداری ساڵی ١٩٩١دا و لە ئێوارەی نەورۆز، تاجی سەركەوتنی لەسەری كەركووكی داگیركراوی دڵی كوردستان نا و كوردستانیبوونی ئەو شار و مەملەكەتەی بۆ هەموو جیهان سەلماند، كە ئەگەر ئەمڕۆ بەهۆی خیانەت و گەلەكۆمەكێی هەرێمی و نێودەوڵەتی داگیركراوەتەوە، بەڵام هەرگیز لە كوردستان دانابڕێت.

قسە لەسەر بەهار و نەورۆزە و نەورۆزیش بۆ كورد ناسنامە و سمبولێكە سەری لە ناو مێژوودایە و لەگەڵ ڕۆح و بوون و مانەوەماندا ئامادەیی هەیە، لە نەورۆزیشدا كەلتوور و داب و كەلەپووری كوردەواریی ئاوێزان دەبن و كەشێكی تا بڵێی كوردەوارییانەی ڕەسەن بەرجەستە دەبێت، چ لە ڕازانەوەی سرووشت، چ لە ڕازانەوەی مرۆڤ بە جلوبەرگی ڕەنگاوڕەنگی كوردەوارییەوە بۆ ئافرەتان و پیاوان و منداڵان، چ نەغمەی بولبولان و سەردەرهێنانی نێرگز و كرووك و گوڵەكێویلەی بەهاری، چ بە دەركەوتنی گیاوگۆڵی دەشت و دەر و چیاكان، وەك خۆراكی پڕ وزە و ڤیتامین، چ دەربوونی كانی و كارێز و ڕووبار، چ چرۆكردنی دار و درەخت، ئەمانە وێڕای ئەوەی لە سەرەوە باسمان كرد، دەنگ و سەدا و چریكەی زیرەك و سروودی ئەم ڕۆژی ساڵی تازەیە هاتەوە، تێكڕا دەبن بە سۆناتایەكی هێندە بەرز، كە ئەگەر قەهری ژێردەستەیی و داگیركاری و شەڕ و كوشتار و دەربەدەری و ئاوارەیی و ئەنفال و ڕاگواستن و كیمیابارن و پەككەوتەبوون و شەهیدبوونی ئەو هەموو ئازیزانەمان نەبووایە، ئەوەندە چێژمان لەو ئادائە وەردەگرت، كە نە باسی بكرێ و نە بنووسرێتەوە.
بەخێر بێتەوە بەهار، بە نێرگز و باران و گژوگیا و نەورۆز و ئاگر و پیرەمێرد و زیرەك.
پیرۆز بن ئەو ڕۆژانەی مێژووی ئازادی و مانەوەمانن.

Top