هێڵی زێڕین

هێڵی زێڕین

لە ژمارەیەكی پێشووتری (گوڵان)دا گوتم، لە هونەری نیگاردا، ڕەنگ ڕەگەزی باڵادەستە. لەمەدا زێدەڕۆیی و زێدەگۆییم نەكردووە، دروست ڕاستیم دركاندووە. بۆ تەواو كردنی ئەو ڕستەیە، پێویستە بڵێم، هێڵ دووەمین شاڕەگەزی هونەری نیگارە لە پاش ڕەنگ. ئەو هونەرمەندەی سیحری هێڵ و تەلیسمی جووڵە و جمینی بگرێتە دەست، بیخاتە ژێر هەژموون و دەسەڵاتی خۆیەوە، هونەر لە ئاستێكی باڵادا دەخاتە ڕوو. لە تەواوی ناوەندەكانی ئەكادیمیی خوێندنی هونەری شێوەكاریدا، پرۆگرامی خوێندن و هەوڵی مامۆستایانی هونەر بۆ ئەوەیە، شاگرد و شەیدای ئەم تەرحە هونەرە لە بەكار هێنانی ڕەنگ و كێشانی هێڵدا، توانا و خاوەن دەسەڵات بن.

ئامادەكردنی/ تاریق كارێزی

هێڵی زێڕین

گرفتار كاكەیی هونەرمەندێكی كوردستانە و لە ئەڵمانیا دەژی، نموونەی وانەیەكی سەرسوڕهێنەرمان دەخاتە بەردەم. ئەم هونەرمەندە نموونەیەكی گەشە بۆ باڵادەستیی بەهرە، ئەو نەچووەتە بەر خوێندنی هونەر لە بواری ئەكادیمیدا، كەچی هێڵی ئەو لە پلەی زێڕیندایە، كەمن ئەو هونەرمەندانەی هێڵ بەو ئاستە باڵایە دەگەیەنن. هونەرمەند كە سیحری هێڵی لە دەستدا بوو، ئیدی نیگار بكێشێت یان كاری دیكەی هونەر بكات، بەرهەمەكەی بەرز و دانسقە دێتە دەست. بەر لە ساڵی 1991، باشووری كوردستان بەرحوكمی سیستەمی دەسەڵاتێكی دیكتاتۆر بوو، هەم ئازادی هەم دەرفەتی كار كردن، وەك حوشتر و نووكی دەرزی وا بوون. بۆیە یەكەمین دەركەوتنی گرفتار لە دوای ڕاپەڕینی ئاداری 1991 بوو. ئەو ئیدی لە كەركووكی ژێردەستی دیكتاتۆر دابڕا و لە هەولێری ئازاددا گیرسایەوە.

هێڵی زێڕین

دوای تێپەڕ بوونی 32 ساڵ بەسەر ڕووداو و وەرچەرخانەكەی ئاداری 1991، ئێستا گرفتار كاكەیی (ناوی ئازادە و گرفتاریش ناسناویەتی) هونەرمەندێكی فرە ناسراوی كوردستانە. ئەو یەكەمین جار زۆر بە تەوژم و تینەوە هونەری كاریكاتێری لە هەفتەنامەی (موئتەمەر) ئۆرگانی كۆنگرەی نیشتیمانیی عیراق بە سەرۆكایەتیی ئەحمەد چەلەبی، بڵاو كردەوە. ناوەڕاستی سەرەوەی دوایین لاپەڕەی هەموو ژمارەیەكی ئەو هەفتەنامەیە، كە ئۆرگانی لایەنێكی بەرهەڵستكاری ڕژێمی سەدام بوو، بە كاریكاتێرێكی گرفتار دەڕازایەوە، بە بێ ئەوەی كەس بزانێت ئەم گرفتار ناوە كێیە؟ هەر كەسە مەزەندەی بە لای شتێكدا دەچوو. ئەگەرچی ناوەكە (گرفتار) كوردی بوو، بەڵام زۆر كەس پێی وا بوو ئەمە یەكێكە لە گەورە كاریكاتێریستانی بەغدا، كە لە دنیای ڕۆژنامەوانیی ئەو شارەدا توانا و ئەزموونی خۆی قاڵ كردووەتەوە، ئەمڕۆش ها لە كوردستان و كاریكاتێر بە ناسناوێكی كوردی بڵاو دەكاتەوە.

هێڵی زێڕین

زۆری نەبرد گۆڤار و ڕۆژنامە كوردییەكانی شاری هەولێر لاپەڕەكانیان بە ڕووی بەرهەمەكانی گرفتاردا كردەوە. بە زۆری كاریكاتێر، لە پاڵ ئەویشدا نیگاری تایبەت بە منداڵانیشی لە گۆڤارەكانی منداڵاندا بڵاو دەكردەوە. تۆی خوێنەر ئێستا مافی خۆتە بپرسیت، ئاخۆ هێڵی زێڕین كە ناونیشانی بابەتەكەمانە، چ واتایەكی هەیە، چ پەیوەندییەكی بە گرفتارەوە هەیە؟ سوپاس بۆ پرسیارەكەتان، فەرموون با بۆتانی ڕوون بكەمەوە.
هەموو تەنێك لە جیهان و گەردووندا، شێوە و قەبارەی هەیە، شێوە و قەبارەش هێڵ سنووری دەرەوەی دیاری دەكات. نەك هەر من و تۆ، بەڵكوو منداڵێكی ساوای تەمەن دوو سێ ساڵیش، بە سووكە قەڵەمكێشییەكی سەر كاغەز، وێنەی گیاندار یان بێ گیانێكی لە زەیندا بەرجەستە دەبێت. ڕوونتر دەڵێم، قەڵەمێك دەست بدێ و لە بەردەمی منداڵێكی ساوا بەسەر كاغەزیدا بهێنە و بە هێڵ وێنەی پشیلەیەك بكێشە، منداڵەكە ئەگەر توانای قسە كردنی هەبێت، دەڵێ: ئەوە پشیلەیە. لێرەدا تێدەگەین وزە و بڕست و توانستی هێڵ چەند گەورەیە. هێڵ لە لای هونەرمەندی شێوەكار سەنگی مەحەكە، چەندی ئەو بەسەر جووڵە و جمینی هێڵدا زاڵ بێت، چەندی هێڵ لە لای ئەو بەهێز و دامەزراو بێت، چەندی توانای سەپاندنی هەژموونی هزر و هەڵچوونی خۆی بەسەریدا باڵادەست بكات، هێندە لە دنیای هونەردا بەرز دەبێتەوە و لە پیشەی هونەركاریدا هەڵدەكشێت.

هێڵی زێڕین

لە هەر بەرهەمێكی شێوەكاریدا (نیگار، هێڵكاری، كاریكاتێر، قەڵەمكێشی) تەنانەت پەیكەریش، توانستی هونەرمەند لە بەرجەستە كردنی هێڵدا خۆی دەنوێنێت. ئەوە بەرهەمی هونەرە ساغی دەكاتەوە، كە ئاخۆ هونەرمەندی شێوەكار تا چ ئەندازەیەك لە پلیكانێی هونەردا بەرەو ژوور هەڵكشاوە. سێ نموونە دەری دەخەن هونەرمەندی شێوەكار تا چ ئەندازەیەك لە پیشە و بەهرەكەیدا باڵادەستە، وێنەی مرۆڤ، وێنەی ئەسپ و كاریكاتێر. لەم سێ بوارەدا بڕستی شێوەكار و توانای لە جۆشدانی هێڵ، زۆر ڕوون دەردەكەوێت. گرفتار بۆیە بە پلەی هێڵی زێڕین گەیشتووە، چونكە سەرووی (30) ساڵە ئەو بە هێڵ سەلماندوویەتی مامۆستایەكی كارامەی مەیدانی هونەرە. گەورەترین گەواهیش بۆ قسەی ئێمە، بەرهەمەكانیەتی. ئەو پتر لە كاریكاتێردا بەهرەی خۆی تاقی كردووەتەوە، كاریكاتێرێك پڕ بە زار هاوار دەكات، تیر و توانج دەوەشێنێت، گاڵتە و لاقرتی بەم و بەو دەكات.

Top