سەحەر كەریم مەحموود، ناسراو بە سەحەر مەحموود زادە، خانمێكی پەنجەڕەنگینی كوردە و لەگەڵ ئەوەی خاوەنی بڕوانامەی دیپلۆمی بیركارییە، بەڵام تێكەڵ بە جیهانی ئارت و هونەر بووە. چەندین ساڵە سەرقاڵی كاری هونەری و ڕستن و چنین و دروومانە و جەخت لەوە دەكاتەوە كە مرۆڤ (ژن و پیاو) جەوهەر و گەوهەریان كاركردنیانە و لەم دیمانەیەدا لەگەڵ گۆڤاری گوڵان باسی ژیانی تایبەتی خۆی دەكات.

گوڵان: كۆمەڵایەتی

 

سەحەر كەریم یەكی ڕەزبەری ساڵی 1980 لە شاری سەقزی ڕۆژهەڵاتی كوردستان لەدایكبووە. خوێندنی سەرەتایی و داواناوەندی لەو شارەدا تەوا كردووە، ئێستا قوتابیی زانكۆیە و وەك خۆی باسی دەكات ئاواتی گەورەی ئەوەیە پیشانگایەكی هونەری بۆ بەرهەم و كارەكانی بكاتەوە.

‏‎لە وەڵامی ئەو پرسیارەدا كە چ خوێندنەوەیەكت بۆ كاركردنی ئافرت و بەشداریكردنی لە دابینكردنی بژێوی خێزان هەیە؟ گوتی: «مرۆڤ (ژن و پیاو) جەوهەر و گەوهەریان كاركردنیانە، ژنیش وەك پیاو مافی خۆیەتی كار بكات و ئابووریی سەربەخۆی خۆی هەبێت. چونكە ئافرەت ئەگەر لە ڕووی ماددی و ئابوورییەوە سەربەخۆ بێت، كەمتر ڕووبەڕووی توندوتیژی دەبێتەوە، مۆڵەتیش بە كەس نادات مافەكانی پێشێل بكات».

ئەو خاتوونە جەخت لەوە دەكاتەوە كە «بەرهەمی هونەری و بەتایبەتی كاری دەستی و ڕستن و چنین و تەنانەت دروومان، وەك منداڵێكی خۆت وایە و دوای تەواوكردن و كامڵبوونی ئاسوودەیی و ئارامیت پێ دەبەخشێت.» هەر لەو بارەیەوە دەڵێت: «من بەرهەمەكانی خۆمم زۆر خۆش دەوێت، بۆیە ئاواتی گەورەم ئەوەیە پیشانگایەك بۆ بەرهەم و كارەكانم بكەمەوە».

ئەو خانمە پەنجەڕەنگینە لە وەڵامی ئەو پرسیارەدا كە خێزانەكەت تا چ ئاستێك هاندەر و پشتیوانت بوون، بۆ تێكەڵبوون بە كاری هونەری دەستی و درێژەدانت بە خوێندن؟ گوتی: «زۆر بەداخەوە دایك و باوكم كۆچی دواییان كردووە، هەروەها خوشكی گەورە و برایەكی دڵسۆزم، ئێستا تەنیا یەك براگەورەم هەیە، كە هەمیشە پشتیوان و هاندەرم بووە و باوكایەتیی بۆم كردووە. هەر لێرەوە زۆر زۆر سوپاسی دەكەم و لە خوای میهرەبان داواكارم سێبەری پایەدار و تەمەنی درێژ بكات».

ئەوەش ناشارێتەوە كە لە ژیانی بیست ساڵی رابردوویدا تووشی زۆر گرفت و ئاریشە بووەتەوە. هەر لەو بارەیەوە گوتی: «هیچ كەسێك لەم جیهانەدا نییە كێشە و گرفتی نەبێت و هەمیشە ڕێگەكانی بەردەمی بێ كۆسپ بێت، بەڵام گرنگ ئەوەیە بە سەریدا زاڵ بیت و ئیرادەت لاواز نەبێت. نموونەی ژنان و كچانی زۆرمان هەیە كە لە نێو خێزانی خۆیان و كۆمەڵگەشدا ڕێز لە ئیرادە و ئامانجە مرۆیی و جوانەكانیان دەگرن. زۆرن خانمانی چالاكی مەدەنی، ژمارەی ژنانی سەركەوتووش لە بواری بزنێس و كاری بازرگانی كەم نییە، بەڵام هیچیان بە بێ ئەرك و ماندووبوون و متمانەكردن بە خۆیان بەو پێگەیە نەگەیشتوون».

وەك دواپرسیاری گۆڤاری گوڵان داوای پەیامی ئەو خاتوونە كرا بۆ ئافرەتانی كوردستان و بەمجۆرە پەیامەكەی ئاراستە كردن: «پەیامی من بۆ هەموو خانمێك بە كچان و ژنانەوە ئەوەیە كە خۆیان گیرۆدەی ناوماڵ نەكەن. زۆر بایەخ و گرنگی بە پەروەردە و فێربوون بدەن. رێگاكانی بوون بە خاوەن ئابووریی سەربەخۆ بدۆزنەوە. ئەگەر هەر دەرفەتیان نەبوو، لە ماڵەوە لە ڕێگەی مۆبایلەكانیانەوە دەتوانن زۆر كاری هونەری و تەنانەت كاری شێف و دروستكردنی خواردنی جۆراوجۆر فێر ببن و، كڕیاریش بۆ بەرهەمەكانیان بدۆزنەوە. گرنگ ئەوەیە داهاتی خۆیان هەبێت، كە هەم دەتوانن هاوكاریی خێزانەكەیانی پێ بكەن، هەم بۆ خۆیان هەمیشە چاو لە دەستی باوك و برا و هاوسەر نەبن. ئافرەتی خاوەن كار لە ناو خێزان و خانەوادەشدا بە چاوی ڕێز و حورمەتەوە سەیری دەكەن. منیش نەك هەوڵ دەدەم ببمە خاوەن كار، بەڵكو ئاواتی گەورەم ئەوەیە دەرفەتی كار بۆ خانمانی كوردستان بڕەخسێنم، هەروەها هیوادارم كچان و ژنانیش وەك پیاوان دەرفەتی كاریان هەبێت و بەرابەر و یەكسان بن».