ڕۆژی شەممە 24ی كانوونی یەكەمی 2022 لە سەلاحەددین سەرۆك مەسعود بارزانی پێشوازی لە دكتۆر مەشعان ئەلخەزرەجی سەرۆكی دیوانی وەقفی سوننە و شاندێكی یاوەری كرد.
لە دیدارەكەدا سەرۆكی دیوانی وەقفی سوننە پێزانینی بۆ ڕۆڵی مێژوویی سەرۆك بارزانی لە خەبات و تێكۆشانی گەلانی عێراق هەبوو و، سوپاسی هەوڵەكانی سەرۆك بارزانی كرد بۆ پاراستنی فەرهەنگی پێكەوەژیان و لەیەكنزیككردنەوەی پێكهاتەكان و لێكتێگەیشتن و برایەتی و تەبایی نێوانیان. هەروەها سوپاسی هەرێمی كوردستانیشی كرد كە لە ڕۆژانی تەنگانەدا میوانداریی سەدانهەزار پەنابەر و لێقەوماوی كردووە و، ئەزموونی هەرێمی كوردستانی وەك سەرمەشقێكی باش بۆ بەشەكانی تری عێراق لەقەڵەم دا.
هەر لەو دیدارەدا بیروڕا لەبارەی پڕۆسەی سیاسیی عێراق و سوودوەرگرتن لە ئەزموون و هەڵەكانی ڕابردوو ئاڵوگۆڕ كرا و ڕۆشناییش خرایە سەر بار و گوزەرانی خەڵك لە پارێزگاكانی ناوەند و باشووری عێراق.