پەیكەرسازانی كورد

هونەری پەیكەر، ئەرك و ئەشك و خەرجی و زەحمەتییەكی زۆری دەوێت، بۆ تەواو كردنی پەیكەرێك، تەكنیك چەند قۆناغێكی كار كردنی دەوێت. لە ناوەندی هونەریشدا، دەبینین ژمارەی پەیكەرساز زۆر لە نیگاركێش كەمترن، دروست كردن و بەرهەم هێنانی پەیكەر، (وەك گوتمان) كار و كات، ئەشك و خەرجیی زۆرتری دەوێت، هەموو هونەرمەندێكی شێوەكار شانی ناداتە بەر. ئەمەشە پاساوی ئەوەی پەیكەرساز كەمن. ئەوانەی خۆیان بۆ هونەری پەیكەرسازی تەرخان دەكەن، لەوە گەیشتوون پەیكەر هونەرێكە لە دەرەوەی هۆڵ و مۆزەخانەش جێی خۆی دەگرێت، لە نێو چەقی شاراندا وەك سیمبوڵ و هێما و ڕواڵەتی كولتوور و میراتی شارستانی، جێ دەگرێت، خۆی لە نێو شەقام و گۆڕەپاندا دەسەلمێنێت، وەك بەشێك لە دیمەنی شار بە ناسنامەوە، پەیكەر بە دەنگی بڵند، بەراتی جوانی و چێژ پەخشان دەكات.

كۆ كردنەوەی 24 پەیكەرتاش بۆ پایتەختی ڕۆشنبیریی كوردستان دەسكەوتێكی گەورەیە. خۆ ئەگەر لەو 47 پەیكەرەی لە پیشانگایەكدا نمایش كرا بوون، ورد ببینەوە، تێدەگەین (ناوەندی 7 ڕەنگە) لە چ ئاستێكی پێگەیشتوودا كاری كردووە. تەواوی پەیكەرەكان سیمای شوێن و زەمەن (جوگرافیا و مێژوو)یان لە خۆدا نواند بوو. دروست كردنی پەیكەر بۆ مەزنانی نەتەوە، تێكەڵ كردنی هونەر لەگەڵ بابەتی مرۆڤانەی بەرز، تراژیدیای نەتەوەیەك لە كاروانی تێكۆشانیدا، پەیوەست بوون بە ڕێچكەی ڕیالیست لە هونەردا، هەموو ئەمانە سەنگ و قورساییەكی زۆریان بەم چالاكییە ئاست بەرزەی هونەر بەخشی.
لە گۆشەنیگای ئەم پیشانگایەوە ئەگەر باسی هونەری پەیكەرسازی لە كوردستاندا بكەین، بەرهەم و داهێنانی سەنگین لە بەر دەستدایە، ئیدی كار ئەوە دەخوازێت، هەم كەرتی گشتی و هەم كەرتی تایبەت، لە ئاستی پرۆژەكانی حكومەت و وەبەرهێنەران و سەرمایەداراندا، كار بۆ تێكەڵ كردنی هونەری پەیكەرسازی بە هەموو پرۆژەیەكی ئاوەدانی بكرێت. ئامادە بوونی هونەر، بە تایبەتی پەیكەرسازی لە تەك هونەری تەلاسازیدا، ستاتیكای شوێن بەرز دەكاتە، هەستی جوانخوازانەی خەڵك دەلاوێنێتەوە، پەیام و گوتاری نەتەوە و نیشتیمانیش، بواری نمایش كردن و قسە كردنی دەبێت. شاریش ئەو شارەیە، هونەر زمانی ئاخافتنی بێت.