لەگەڵ ئەو پێشكەوتنە گەورەیەی كە ئەمڕۆ لە دونیای كار و سەرمایەداریدا لە هەرێمی كوردستان ڕەنگی داوەتەوە، دەرفەتی كار بۆ ئەوانەی خوازیاری كارێك بن، بەدی دەكرێت، لەم نێوەندەدا ئافرەتانیش دەستەوەستان نین لە بازاڕی كاردا، بەڵكو ئەوانیش لە هەوڵ و كێبڕكێدان و، زۆریشن لەو خانمانەی دوای تەواوكردنی خوێندن لە بری ئەوەی چاوەڕێی دامەزراندن لە كەرتی حكوومی بكەن، بەهرە و تواناكانیان برەو پێداوە و لەو گۆڕەپانەدا ئەسپی خۆیان تاو داوە، بەشێكی زۆری ئەو خانمانە لە نێو ماڵەكانیاندا كار دەكەن، چ لە بواری كابانی، یان بواری دەستڕەنگینی بێت. دەروون هیوا فەریق یەكێكە لەو خانمانە و باسی ژیانی تایبەتیی خۆی و كارەكەی بۆ خوێنەرانی گۆڤاری گوڵان دەكات.

 

گوڵان: كۆمەڵایەتی

 

 

دەروون هیوا فەریق لە دایكبووی ساڵی ١٩٨٩، دەرچووی بەشی جیۆلۆجییە لە زانكۆی سلێمانی و چەند ساڵێك وەك وانەبێژ كاری مامۆستایی كردووە، بەڵام عەوداڵی خوێندنی باڵاتر بووە و هەر لەو بارەیەوە دەڵێت: «دوای ئەوەی بەشی جیۆلۆجیم لە زانكۆی سلێمانی تەواو كرد، وەك نزیكەكانم پێم دەڵێن حەزم بۆ خوێندن تەواو نابێت، بۆیە جارێكی دی پەیمانگای دەرمانسازیم خوێند و توانیم بە پلەی یەكەم تەواوی بكەم، لە ئێستادا لە یەكێك لە نەخۆشخانەكان وەكو خۆبەخش كاردەكەم، چونكە تاوەكو ئەمڕۆ لە كەرتی حكوومی هەلی دامەزراندنم بۆ نەڕەخساوە.» گوتیشی: «وێڕای خوێندن و وەرگرتنی بڕوانامە، كاری چنینیش دەكەم، لەگەڵ دوو خوشكم لە ماڵەوە ئەو كارە دەكەین، هەرچەندە من زیاتر دیزاینی كارەكان دەكەم، ڕاستە ماندووبونێكی زۆری هەیە، بەڵام وەك ئاشكرایە هیچ كارێكیش بێ ماندووبوون نابێت و زۆر جار لە كاتە درەنگەكانی شەو خەریكی ئامادەكاریم بۆ كارێكی نوێ.»

لە وەڵامی ئەو پرسیارەشدا كە چۆن هاوسەنگیت لە نێوان كاری ناوماڵ و كاری نەخۆشخانە و كارە دەستییەكەت ڕادەگریت؟ گوتی: «كاتێك خولیات بۆ چەند كارێك هەبێت، بێگومان ماندووبوونی زۆریشی هەیە، بۆیە منیش زۆربەی كاتەكان بە چەند كار سەرقاڵم، بەڵام لەبەر ئەوەی هەڵبژاردەی خۆمە، بۆیە بە ئارەزویەكی زۆرەوە و بە پێی توانا و مەجال هەموویان جێبەجێ دەكەم».

وەك باسی كرد، ئەو شتانەی دروستیان دەكات و بەرهەم دەستییەكانی بە شێوازی ئۆنلاین دەفرۆشێت و هەر لەو بارەیەوە گوتی: «بە داخەوە زۆر كەس ترسی لە كاری ئۆنلاین هەیە، چونكە زۆر جار ڕەنگە ئەو شتەی ئۆردەریان كردووە ئەوە، نەبووبێت، بەڵام سوپاس بۆ خوا، ئەو كەسانەی داوایان لە ئێمە كردووە، شتەكانیان زۆر بە دڵ بووە واتە فیدباكمان زۆر باش بووە».

 سەبارەت بە داهاتووی كارەكەشی دەڵێت: «لە داهاتوو بە پشتیوانی خوای گەورە بەتەماین شوێنێكی تایبەت بە خۆمان هەبێت، كە لەگەڵ كاری چنینەكەشدا، هەموو پێداویستییەكانی چنین و دروومانی تێدا بێت، كە كەسانی دیكەش بتوانن كاری تێدا بكەن و سوودمەند بن تیایدا».

دواپرسیاری پەیامنێری گوڵان ئەوە بوو: «ئایا توانیوتە بە داهاتی كارەكەت لە دەستەبەری بژێوی خێزانەكەت بەشداربیت و ئەركی سەرشانی خێزانەكەت كەم بكەیتەوە؟

دەروون هیوا لە وەڵامدا گوتی: «داهاتی هەیە، بە دڵنیایی، بەڵام ڕەنگە هیشتا لای زۆرێكمان كاتێك نرخەكەی دەزانین، پێمان وابێت كە گرانە و ماندووبوون و كوالێتییەكە لەبەر چاو ناگرین، هەندێك جار خوزگە دەخوازم وەك میللەتانی دیكەی دونیا زیاتر قەدری كارە دەستییەكانمان بزانین و ئەو نرخەی لە سەریەتی بە شتێكی زۆری نەزانین، چونكە كاری دەست، واتە هەموو شتێك بە دەست دروست دەكرێت، بە بێ بەكارهێنانی هیچ ئامێرێك، ئەوەش ماندووبوون و كاتێكی زۆری دەوێت».