سه‌رۆك نێچيرڤان بارزانى به‌شدارى له پرسه‌ى هه‌ردوو مامۆستاى زانكۆدا ده‌كات
ئه‌مڕۆ چوارشه‌ممه 2022/6/29 به‌ڕێز نێچيرڤان بارزانى، سه‌رۆكى هه‌رێمى كوردستان، له هه‌ولێر به‌شدارى له پرسه‌ى هه‌ردوو مامۆستاى خوالێخۆشبووى زانكۆى سه‌ڵاحه‌دين د.كاوان ئیسماعیل و د.ئیدریس حەمەخان كرد كه دوێنێ سێشه‌ممه له تاونكارييه‌كدا گيانيان له ده‌ست دا.
سه‌رۆك نێچيرڤان بارزانى وێڕاى پێشكه‌شكردنى پرسه و سه‌ره‌خۆشى و ده‌ربڕينى هاوسۆزى له‌گه‌ڵ خانه‌واده و كه‌سوكار و مامۆستايان و قوتابيانى زانكۆدا، هيواى خواست خواى مه‌زن گيانى هه‌ردووكيان به به‌زه‌يى و ميهره‌بانيى خۆى شاد بكات و سه‌بوورى و ئارامى به هه‌مووان ببه‌خشێت.
به‌ڕێز سه‌رۆكى هه‌رێمى كوردستان هه‌روه‌ها هه‌مووانى دڵنيا كرده‌وه كه دادگا و لايه‌نه په‌يوه‌نداره‌كان هه‌موو ڕێكارێكى ياسايى ده‌گرنه به‌ر و تاوانكار ڕووبه‌ڕووى سزاى ياساييى خۆى ده‌بێته‌وه.
