شكۆدار بێت سی و یه‌كه‌مین ساڵیادی راپه‌ڕینی
جه‌ماوه‌ری باشووری كوردستان
- جه‌ماوه‌ری خۆڕاگرى كوردستان ...
- كه‌سوكار و بنەماڵەی سەربەرزی شه‌هیدانی كوردستان ...
سی و یه‌ك ساڵ به‌ر له‌ئه‌مڕۆ له رۆژی 5ی ئاداری ساڵی 1991 ، جه‌ماوه‌ری باشووری کوردستان له رانیه‌ی ده‌روازه‌وه راپه‌ڕی و، له‌ماوه‌یه‌كی كورتدا راپه‌ڕین هه‌موو شار و شارۆچكه و گونده‌كانی باشووری كوردستانی گرته‌وە و، توانرا كوردستان له به‌عسییه‌‌كان پاكبكرێته‌وه و موژده‌ی ئازادی و سه‌ركه‌وتنی گه‌لی كوردستان به‌سه‌ر زولم وسته‌م و دكتاتۆرییه‌ت رابگە‌یەنرێت، له‌م رۆژه مێژووییه‌دا گه‌لی كوردستان به هه‌موو دونیای راگه‌یاند ژێرده‌سته‌یی قبوڵناكات و هه‌ر كاتێ ده‌رفه‌ت له‌باربێت راپه‌ڕین و شۆڕش بەرپا ده‌كات و كوردستان ده‌كاته گۆڕستانی دوژمنان و داگیركه‌ران.
ئه‌مساڵ لەکاتێکدا کەوا یادی راپەڕین دەکەینەوە كوردستان و عێراق و ناوچه‌كه و جیهان به‌گشتی له‌به‌رده‌م كۆمه‌ڵێك كێشه و قه‌یران و گۆڕانگاریدان له‌وانه هێرشی سه‌ربازی رووسیا بۆ سه‌ر ئۆكراین و هه‌وڵدان بۆ داگیركردنی ئه‌و وڵاته ئەمەش هاوكێشه نێوده‌وڵه‌تییه‌كان ده‌گۆڕی و كێشه‌كان زیاتر قوڵده‌کاته‌وه، هه‌روه‌ها كێشه‌ی كوردستان له‌گه‌ل حكومه‌تی عێراق له‌سه‌ر مه‌سه‌له‌ی بودجه و به‌تایبه‌ت بڕیاری ئه‌م دواییه‌ی دادگای فیدراڵی عێراق سه‌باره‌ت به‌نه‌وت و گازی كوردستان کە بڕیارێکى ناده‌ستووری و سیاسییه، مه‌به‌ستیان دژایه‌تی گه‌لی كوردستان و بچوككردنه‌وه‌ی قه‌واره‌ی سیاسی باشووری كوردستان و له‌ناوبردنیه‌تی، بۆیه پێویسته به‌زووترین كات ده‌سه‌ڵاتی كوردستان به‌راوێژ له‌گه‌ل سه‌رجه‌م لایه‌نه كوردستانییه‌كان بە یەکدەنگى و یه‌كڕیزى کار بۆ چاره‌سه‌ركردن و ده‌ربازكردنی ئه‌م بارودۆخه بکات و له نه‌ورۆزی سیمبۆلی شۆڕش و راپه‌ڕینی كوردان كارتی ریفراندۆم كه به‌ڵگه‌نامه‌یه‌كی زۆر گرنگه بۆ سه‌ربه‌خۆیی كوردستان به‌كار بهێنێت و، هەروەها پێویستە هه‌موو هه‌وڵێكمان بخه‌ینه‌گه‌ڕ بۆ گه‌ڕاندنه‌وه‌ی كه‌ركووك و خانه‌قین و به‌دره و جه‌سان و مه‌خموور و هه‌موو ئه‌و شوێنانه‌ی به‌پیلانێك كه‌وتنه‌وه بنده‌ستی سوپای داگیرکەری عێراق.
له‌یادی راپه‌ڕینی مه‌زن و شكۆداردا پیرۆزبایی له‌خۆمان جه‌ماوه‌ری كوردستان ده‌كه‌ین و خوازیارین ئه‌م یاده ببێته نه‌خشه‌رێگه‌ی یه‌كڕیزی و یه‌كگوتاری لایه‌نه سیاسییه‌كان و كۆتایی هاتن به كێشه و گرفتی نێوان لایه‌نه‌كان و به‌هه‌موو لایه‌كمان نێوماڵی كوردستان رێكبخه‌ینه‌وه و بەهەمان رۆحیەتى راپەڕینى ١٩٩١ پارێزگاری له ئه‌زموونی باشوور و رۆژئاوای كوردستان بكه‌ین، به‌تایبه‌ت له‌كاتی ئێستادا کە دوژمنان و داگیركه‌رانی كوردستان هه‌موو هه‌وڵێكیان خستۆته‌گه‌ڕ بۆ دژایه‌تیكردنی گه‌لی كوردستان و له‌باربردنی ئه‌زموونه حوكمڕانییه‌كانی، له هه‌مان كاتدا پێویسته حكومه‌تی كوردستان ئاوڕی خێرا و زیاتر له فه‌رمانبه‌ران و مامۆستایان و خانه‌واده‌ی شه‌هیدان و خاوه‌ن پێداویستی تایبه‌ت و خانه‌نشینان و خه‌ڵكی كوردستان به‌گشتی بداته‌وه بۆ دابینكردنی مووچه له‌كاتی خۆی و باشتركردنی ژیان و گوزه‌رانیان و پێشکەشکردنى خزمەتگوزارى زیاتر.
- نەمری و سه‌ربه‌رزی بۆ شەهیدانی رێی سەرخۆبوون و ئازادی کوردستان.
- مردن و رووڕه‌شی بۆ دوژمنان و داگیركه‌رانی كوردستان.
مه‌كته‌بی سیاسیی
یه‌كێتی نه‌ته‌وه‌یی دیموكراتی كوردستان YNDK
14ی ره‌شه‌مێی 2721ی كوردی
5ی ئاداری 2022ی زایینی
