لە داردا،پۆترێتی خاڵكاری

دایكانی سەربەرزی ئەو ماڵباتانەی كورد، ناچار بوون بۆ رۆڵەكانیان هەم دایك بن، هەمیش باوك، بۆ دابینكردنی بژێویی ژیان، گەرموگوڕكردنی بەرهەمی كاری دەست یەكێك بوو لەو رێكارانەی كە خانمانی سەربەرزی ئەو ماڵباتە كوردانە پەنایان بۆ برد، لە هەلومەرجێكی زۆر دژوار و لە سایەی گوشاری داگیركەردا، ئەو خانەوادە ستەم لێ كراوانە گوزەرانیان دەكرد.
كیڤان بە حوكمی بچووكیی تەمەن لەو ئەنفالە رزگاری بوو، ئەو هەر لە منداڵییەوە لە نەخشی ئەو كارە دەستییانەوە حەزی وردەكاری و هونەری نیگاری لە لا دەڕسكێت، لە قۆناغی یەكەمدا هەوڵی دا بە رەنگ لەسەر كەرەستەی وەك (كاغەز، كانڤاس، كارتۆن) لە شێوەی نیگاری پڕ لە وردەكاریدا، كار و هونەر بكات، هونەردۆستان لە چەند پیشانگایەكدا بەرهەمی كیڤانیان لە نێو شەپۆلی ناوەندی هونەردا بینی، ئەو بوو بە خاوەن مۆركێكی تایبەت و، وردەكاری و وردەكاریی زیاتر لە بەرهەمدا.

لە هەنگاوێكدا كە خۆی لە گۆڕینی كەرەستە و تەكنیكدا دەبینێت، كیڤان ئەم جارەیان هەر بە سەلیقەی وردەكارانەی خۆیەوە، داری كردووەتە كەرەستەی نەخشاندنی بەرهەمی هونەرەكەی، كەسایەتی و ناودارانی كوردیش كرۆك و ناوەرۆكی بەرهەمەكانی ئەون، لەم هەنگاوەدا پەنای بردووەتە بەر تەكنیكی خاڵكاری، بە خاڵخاڵی رەش پۆرترێت دەنەخشێنێت، ئەمەش هەوڵێكی دروستە بە ئاراستەی زیاتر نزیك كردنەوەی هونەری نیگار لە هەست و خولیاو، زەین و ویژدانی رۆڵەكانی نەتەوە.

خاڵكاری لە رچەی هونەری نیگاردا شێوازێكی باوە، بەرهەمی كیڤان لەم رووەوە لەوەدا تایبەتمەندیی خۆی گەڵاڵە دەكات، كە خەڵكاریی تێكەڵ بە كەرەستەیەكی رەقی وەك دار كردووە، ئەمەش بە شێوەیەكی خۆڕسك تێكەڵ بە هەستی كوردانەی ئەو بووە، كوڕی ماڵباتی نێو نەتەوەیەكی بێبەش لە ئازادی، ئازارچەشتەی دەستی ستەمی داگیركەر، چاوەڕوان ناكرێت گوتاری دیدەییانەی ئەو لە دەرەوەی بازنەی هەستی نەتەوەیی و نیشتمانیانەدا بێت، كیڤانیش (پەیوەست بە هەست و نەست و ویژدانی خۆی) لە رێچكەی ئەو گوتارە، لای نەداوە.