چڕستانی فیگەر

چڕستانی فیگەر

ئا/تاریق كارێزی

 

فەلاح عومەر نیگاركێشێكی باشووری كوردستانە، لە ئەمریكا لە ویلایەتی (ئۆهایۆ)دا دەژی و، دەڵێت: «ئەمریكایی نابنە بینەری تابلۆی ئێمە، خەم و خەون و خولیای ئێمە و ئەوان، نێوانی ئاسمان و رێسمانە.»

ئەم قسەیەی فەلاحی هونەرمەند بە قووڵدا ببەین، تێدەگەین گوتاری دیدەیی هونەرمەندی شێوەكار زادەی رەوشی ژیانی جڤاك و یەك بە یەكی مرۆڤە، لە هەر شوێن و كاتێكدا بێت. ئەمریكایی لە سایەی دەوڵەتێكدا كە كوێخا و سەرداری جیهانە، لە ژیان و ژینگەیەكی تایبەتدا دەژی، كەسێكی كوردستانی هەگبەیەك خەمی بە كۆڵەوەیە، كە زادەی نیشتمانێكی زەوتكراوە، روانینی هەردوو لایان بۆ گوتاری دیدەیی، لە رەوشی ژیانی هەر یەكەیانەوە سەرچاوە دەگرێت.

لە گۆشەی ئەم راستییەوە ئەگەر لە بەرهەمی شێوەكارانی كوردستان بڕوانین، گوتارێكی چڕی دیدەیی، چەشنی تۆمارێكی تەژی لە تراژیدیا و رووداوی سامناك نمایش دەكەن. هونەرمەندی كورد لە بازنەی هزر و خەون و خولیای نەتەوەكەی بەدەر نییە، ئەو هەستیارانەتر تێكەڵ بە چەمك و رواڵەت، دەرهاویشتە و رووداوەكانی بزاوتی تێكڕای ژیانی خۆی وەك تاك و، گەلەكەی وەك جڤاك دەبێت.

لە چوارچێوەی ئەو دیدەی لە بڕگەكانی پێشوودا بۆ بەرهەمی شێوەكارانی كوردستان دەست نیشانم كرد، كلیلی خوێندنەوەی بەرهەمی هەموو شێوەكارێكی كوردستانت دەكەوێت دەست، لەم رووەوە رەنگە ئەزموونی هونەرمەند (عەلی سدیق) چڕتر لە ئەوانی دی، خۆی بنوێنێت. لە ئاست بەرهەمەكانی ئەو هونەرمەندە، ئێمە نەك زمانێكی چڕی ستاتیكا بە دەنگ و رەنگێكی زەق و بڵند دەبیستین، بەڵكو هەلومەرجی ئەو زمانە چڕە بەرەو گۆشەیەكی ئەوتۆی هزر و رامانمان دەبات، بە ئەندازەی ئەوەی ددانی پێدا دەنێین، كە ئێمە ستایلێكی تایبەتی كاركردن بەدی دەكەین، فیگەرستانێك خۆی دەنوێنێت، رەنگە بە دەگمەن هونەرمەند هەبێت، زاتی ئەوە بكات لە كەناری ئەو ستایلەدا مانۆری هونەر بكات.

لە هیچ بستە خاكێكی نیشتماندا، كوردستانیان ئازاد و ئاسایی ناژین، نەتەوەیەك لە رەوشێكی مۆلەقی تەژی لە هەڕەشە و باهۆز و زریان و تۆفدا دەژی، هەموو ئەو فاكتەرانەش مرۆڤ دەخەنە نێو دۆخێكی ناجێگیر و نائاسایی دەروونییەوە، ئەمەش لە هەموو بوارێكی ژیانی مرۆڤی كوردستانیدا، رەنگدانەوە و جێكەوتەی دەبێت.

ئەم كوردستانە نیشتمانێكی سەیرە، هەیە و نییە، سەرزەمینێكی فراوانە و ئەتڵەس نایخوێنێتەوە، ئەتڵەسی سیاسی دەوڵەتی بستۆكە خاك دەخوێنێتەوە، كەچی نیشتمانی پان و بەرینی كوردستان ناخوێنێتەوە، هەموو جیهان هەوڵ دەدات زێد و نیشتمان لە بیری كورد بباتەوەو، كار بۆ ئەوە دەكەن نەخشەی وڵات لە زەینی كوردستانیاندا رەش بكەنەوە، ئەم هەوڵەش هەردەم نابەكام بووە، پووكاوەتەوە، هیچ نا، لەبەر ئەوەی كوردستانیان زۆر بە قووڵی لە ناخەوە، درك بە هەبوونی خۆیان دەكەن، تا رادەی شەیداییش داكۆكی لەو هەبوونە دەكەن.

ئەم بەریەككەوتنەی نێوان واقیع و دیفاكتۆی چەواشە، عەلی سدیق بە زمانی ستاتیكا زۆر بە چڕی گەڵاڵەی كردووە، تابلۆی ئەو لێشیاوی فیگەرە، هوروژمی رەنگ و رووباری جووڵەیە، لە تابلۆی ئەودا سەراپای گەردوون تەژییە لە جووڵە و فیگەر. جەنجاڵییەك بە ژیانی خەڵكی سەرزەمینێكەوە نووساوە، تارێك و روونی ئەوانی تێكەڵ بە یەك كردووە.

شارێكی كوردستان (كەركووك)، زێدی ئەم هونەرمەندەیە، ئەو شوێن و كات بە خۆی ناگرێت، بۆیە لە هەوارگەی تاراوگەیەكدا (ئەڵمانیا)، گیرساوەتەوە، نەك بۆ هەمیشەیی لەنگەری گرتبێت. تابلۆی ئەو بە رەوانی گوزارشت لە كرۆكی مرۆڤی كوردستانی دەكات، خەون و خولیا، ترس و نیگەرانیی ئەم مرۆڤە لە زێدی خۆیدا بە ترۆپك دەگات، بۆیە دەبینین زەوی و ئاسمان لە تابلۆی ئەم هونەرمەندەدا، دۆخی ناجێگیر و مۆلەقی گەلەكەی بەرجەستە دەكات.

چڕستانی فیگەر
چڕستانی فیگەر
چڕستانی فیگەر
Top