پاش قسە مەترسیدارەكانی ساڵح موسلیم لەبارەی دەوڵەتی سەربەخۆوە و لە چوارچێوەی ئەو هەڵمەتە میدیایی و كەمپەینەی پەكەكەدا لە دژی سەربەخۆیی و دەوڵەتی سەربەخۆی نەتەوەیی، ئیبراهیم ئایهان، پەرلەمانتارێكی كوردی توركیایە لەسەر لیستی (هەدەپە)ی سەر بە پەكەكە، لە تویتەرەكەی خۆی جریواندوێتی و دەڵێت: دەوڵەت، واتە: ڕێكخستنی(تەنزیمكردنی) بێ ئەخلاقی.
ڕاستتان دەوێت، قسەكانی پێشووتر و ئێستێی ساڵح موسلیم و ئەم جریوەیەی(ئەگەر جریوە بێت) ئایهان، كرۆكی فیكری بەڕێز ئۆچەلانە لەبارەی دەوڵەت و دەوڵەتدارییەوە بە گشتی، دەوڵەتی نەتەوەیی و دەوڵەتی سەربەخۆی كوردستان بە تایبەتی.
ئۆچەلان، لە دوایین مانیفێستی خۆیدا كە لە زیندان و بندەستی توركانەوە نوسیوێتی، داواكردنی دەوڵەتی سەربەخۆی كوردستان(ئەگەرچی لەو مانفێستەدا چجارەك وشەی كوردستانی بەكار نەهێناوە)، بە مایەی (نەگبەتی و كارەسات) دەزانێت بۆ كورد، پێیوایە(دەوڵەتی نەتەوەیی، مافێكی سەرەخۆرەیە و پێویستە كورد هەرچی زووترە واز لەو مۆدێلە لە ماف و داواكارییە بێنن).
بۆیە، ئەم قسەیەی ئایهان، كەمپەینەكەی پەكەكە، ئیعلانكردنی كانتۆن و خۆسەری دیموكراسی و ڕێكخستنەكانی كۆمەڵگەی دیموكراتیك كە لە ڕووی پەیكەر و دەسەڵاتەكانییەوە، كتومت لە كۆنگرە میللییەكانی كۆمارە كەسكەكەی قەزافی دەچێت، هەروەها لێدوانەكانی ئەم دواییەی ساڵح موسلیم، تەنانەت بانگەشەكانی كانتۆنكردنی شنگال و پشدەر و جیاكردنەوەی كەركووك و سلێمانی لە كوردستان، هەر هەموویان زادەی هزری ئۆچەلانی و ئایدیۆلۆجیایەكی چەپی توندڕەوی ڕادیكاڵی عەنتیكەیە كە باوەڕی بە دەوڵەت و دەوڵەتداری نییە و هەموو كەرەسە و كارەكتەرەكانیشی لە پێناو ڕیسواكردنی فیكری سەربەخۆیی و دەوڵەتی سەربەخۆی كوردستاندا بەكار دێنێت.
بەهۆی ئەو ژاوەژاوەی چەند ڕۆژە ئیعلامی نەوشیروان مستەفا ناوێتییەوە، خەریكە قسە مەترسیدار و عەیبدارەكانی ساڵح موسلیمی سەرۆكی پەیەدە(قیادەی قوتری پەكەكەی لە سوریا)، هەروا بە ئاسانی تێپەڕ دەبن.
ئەوە یەكەمین جار نییە، ساڵح موسلیم، بە ئاشكرا بڵێت: دەوڵەتی سەربەخۆ باوی نەماوە و بانگەشە بۆ تیۆرییەكەی ئۆچەلان بكات كە دەڵێت: با كورد خۆی بۆ دیموكراتیزەكردنی ئەو دەوڵەتانە تەرخان بكات كە تێیاندا دەژی. واتە؛ كورد، واز لە مافی سرووشتیی دەوڵەتی سەربەخۆی خۆی بێنێت، تەنیا خەبات بكات بۆ ئەوەی ئێران و توركیا و عێراق و سوریا بكاتە دیموكراتی و بەشداریی لە بەڕێوەبردنی ئەو وڵاتانەدا بكات. بەم پێیە؛ عەرەب و تورك و فارس، دەوڵەتەكانی خۆیان بمێنێت، كوردیش هەوڵ بدات لە بەڕێوەبردنی ئەو وڵاتانەدا بەشدار بێت.
بێینەوە سەر ئەسڵی قسەكانی ساڵح موسلیم كە ڕەگەزێكی نوێی خستەڕوو. دوای ئەوەی گوتی دەوڵەتی سەربەخۆ باوی نەماوە، نەسیحەتی كوردیشی دەكرد كە دەستبەرداری بەغدا نەبن، چونكە (بەغدا قووڵاییەكی ستراتیجییە بۆ كورد)!!
هەرچەندە ڕوونی نەكردەوە، چۆن چۆنی بەغدا قووڵایی ستراتیجی كوردە، وەلێ‌ بابەتەكە دیارە و تەنانەت زیرەكیی ناوێت تا لە مەرامی ئەم تێزەی پەكەكە تێبگەین. وا دیارە، ساڵح، ناڕاستەوخۆ، بە هەموو كوردی چوار پارچەكە دەڵێت و پەیامێكیشە بۆ داگیركەران كە شام قووڵایی كوردی سوریا، ئەنقەرە قووڵایی كوردی توركیا، تارانیش قووڵایی كوردی ئێرانن. ئەمەش دروست ئەو هزر و ئاراستەیەیە كە داگیركەرانی كوردستان، بێ جیاوازیی، قبووڵیانە و ئامادەن مامەڵەی لە تەكدا بكەن و بگرە هاوكاریشی بن، تا ببێتە بیركردنەوەی هەموو هێز و لایەنە سیاسییە كوردییەكان و هەموو مرۆڤێكی كورد.
هەر لەبەر ئەم بیركردنەوە و تێزەیە، هەر چوار داگبیركەرەكەی كوردستان، كەیفیان بە پەكەكە دێت و هەر یەكەیان بەشێوازی خۆی هاوكاریی دەكات.
بۆیە، سڕینەوەی ناوی كوردستان لە فەرهەنگی پەكەكەدا و ئەوەی ئیبراهیم ئایهان- ی پەرلەمانتاری هەدەپەی سەر بە پەكەكە، بانگەشەی بۆ دەكات، ڕێكخستنی بێ ئەخلاقییە، نەك دەوڵەتی سەربەخۆ.