كوردستان سەركردایەتی .. تێڕوانین.. دەستكەوت

كوردستان سەركردایەتی .. تێڕوانین.. دەستكەوت
دەستكەوتەكانی هەرێمی كوردستان لەم قۆناخە مێژووییەدا، پشت بەو دەرهاویشتانە دەبەستێت كە لە مەیدانی جەنگ دژ بە دڕندەترین هێزی تیرۆریستی كە داعشە بەدەست هاتوون، هەروەها دەرهاویشتەی ئەو دەستكەوتە سیاسییانەیە كە لە چوارچێوەی پرۆسەی سیاسی و دیموكراتی لەناو هەرێمی كوردستاندا بەدەست هاتوون، هەروەها پشت بەستووە بە پێگە و رۆڵی هەرێمایەتی هەرێمە خۆشەویستەكەمان، كە لە ئێستادا رۆژهەڵاتی ناوەڕاست بە پرۆسەی دووبارە داڕشتنەوەی هەیكەل و كێشانی نەخشەیەكی تازە بۆ ناوچەكە تێدەپەڕێت، سەرەنجامیش گرنگترین سیمای ئەم قۆناخە ئەوەیە وەرچەرخانێكی خێرا و ریشەیی بەخۆوە دەبینێت، ئەم وەرچەرخانەش بە جۆرێكە كە تیۆر و بەدیهاتی كاری سیاسی و نێودەوڵەتی بۆ سیاسەت كە رۆژهەڵاتی ناوەڕاست هەتا ئێستا پێی ئاشنا بووە، ناتوانێت تەفسیری بكات.
لە ناو ئەم پۆلە هاودژی و ئاڵۆزییەی سیاسەتی ئیقلیمی و نێودەوڵەتیدا، بایەخی بەڕێوەبردنی حەكیمانە كە خاوەنی تێڕوانینێكی ئایندەیانەیە بۆ بونیادی بەرژەوەندییەكانی هەرێم و گەلی كوردستان دەردەكەوێت، كە بە جۆرێكە كۆمەڵێك بەرژەوەندی گەورە لەدایك بووە و كۆمەڵێك زیانی مەزندەكراوی كەمكردۆتەوە، سەرەنجامیش لە كۆتایی ئەم قۆناخە وەرچەرخاوەدا بە كۆمەڵێك دەستكەوتەوە لەسەر ئەرزی واقیع لێی دەردەچین كە زۆر لە دەستكەوتەكانی پێشتر گەورەترن، لە بێشكەی هەموو ئەمانەشەوە، پاراستنی ئاسایش و سەقامگیری هەرێمی كوردستان و كوردستانێكی ئازاد و سەربەخۆی لێ دێتە ئاراوە.
ئێمە چەندی دەستكەوت لەسەر ئەرزی واقیع بەدەست بهێنین، ئەوجا ئەو دەستكەوتانە لەناو بەرەكانی شەڕی سەربازی بێت، یان بواری ئابووری و سیاسی، هێندە كارتی گوشاری سیاسی تازە لەدایك دەبن لەسەر ئاستی نێودەوڵەتی كە كاریگەری گەورەتریان لەسەر سەربەخۆییمان دەبێت.
لەمیانەی خوێندنەوەیەكی گشتگیرانە سەبارەت بەو دەستكەوتە سیاسی و ئابووری و نێودەوڵەتییانەی هەرێمی كوردستان لەسەر ئاستی ناوخۆ و ئیقلیمی و نێودەوڵەتی بەدەستی هێناون، ئەوە هەست پێدەكەین كە ئەم دوو ساڵەی دوایی تەژین لە هەنگاو و دەستكەوتی ئەوتۆ كە ئاكامی ئەم دەستكەوتانە دەبنە نیشاندەری ئاكامی دەیان ساڵی ئەو خەبات و قوربانیدانەی گەلەكەمان كە لەپێناوی ئەم دەستكەوتانە بە دەیان هەزار شەهیدی پێشكەش كردووە و هەتا ئێستاش خاكی كوردستان بۆنی خوێنی لاوەكانمانی لێدێت.
سەقامگیری سیاسی و سەربەخۆیی ئابووری
لەسەر ئاستی ناوخۆ، وەك دەبینین پارتی دیموكراتی كوردستان بەرپرسیاریەتییەكی مێژوویی هەڵگرتووە و بەهەنگاوی گەورە دەجووڵێت كە خوێندنەوەیەكی وردی تایبەتمەندییەكانی ئەم قۆناخەی لەخۆی گرتووە، بە جۆرێك مامەڵەی لەگەڵ ئاكامی هەڵبژاردنەكانی ساڵی 2013 كرد، لەو روانگەیەوە پارتی دەوڵەتی كوردستان دابمەزرێنێت، نەك لە روانگەیەكی حزبایەتی تەسكەوە لە چوارچێوەی هەرێمێكی لۆكاڵ. بۆ ئەمەش بڕیاری سەركردایەتی پارتی بەو جۆرە بوو كە پێویستە دەست بكرێت بە دانوستاندنێكی سەخت، كە ماوەی زیاتر 9 مانگی خایاند، ئەمەش لە پێناوی ئەوە بوو ئەم كابینە تازەی حكومەت هەموو لایەنەكانی گۆڕەپانی سیاسیی كوردستان لەخۆی بگرێت، ئەمە هەتا ئەگەر لەسەر حیسابی ئیستحقاقی هەڵبژاردنی پارتیش بێت.
پارتی لە پێكهێنانی حكومەتێكی تەوافوقی بنكە فراوانی سیاسی سەركەوتوو بوو، یەكەم هەنگاوی سەركەوتووی ئەم تێڕوانینە كە جێگەی بایەخی بوو، ئەوە بوو ئەم سەقامگیری سیاسییە لە پرۆسە دیموكراتییەكە بەشێوەیەكی گەورەتر لەسەر گۆڕەپانی سیاسەتی ناوخۆیی رەنگدانەوە و بەردەوامی هەبێت. هەروەها لە سەر ئابووریش، وێڕای ئەو قەیرانە داراییەی كە حكومەتی بەغدا لە چوارچێوەی هەوڵەكانی بۆ راگرتنی گەشە و پێشكەوتنی هەرێم بۆی دروستكردووین، بەڵام ئێمە زۆر دەستكەوتی راستەقینەمان لەسەر ئاستی بەدیهێنانی سەربەخۆیی ئابووری بۆ گەلەكەمان بەدەست هێنا، كە ئەمەش وەك گرنگترین كۆڵەگەی پرۆسەی بونیادی سەربەخۆی سیاسی دادەنرێت. بەمەش توانیمان لە خاڵی یەكەمدا دانپێدانانی نێودەوڵەتی بە مافی یاسایی هەرێمی كوردستان بۆ هەناردە كردنی نەوت بەدەست بهێنن، ئەمە سەرباری ئەوەی ئێمە هەتا ئێستاش ئەم شەڕە ئابوورییە بەڕێوەدەبەین، هەتا ئێستاش زۆرمان لە پێش ماوە، بەڵام ئەو هەنگاوانەی لە ماوەی دوو ساڵی رابردوو بەدیهاتوون، هەنگاوی گەورە و چەسپاون بەرەو بەدیهێنانی ئامانجێكی دیكەی ستراتیژی، ئەویش هەناردەكردنی یەك ملیۆن بەرمیل نەوتە لە كۆتایی 2015 و هەناردەكردنی 2 ملیۆن بەرمیل نەوتە لەگەڵ كۆتایی ساڵی 2019. بەمشێوەیە دەستكەوتی دوماهی لە بواری هەناردەكردنی نەوت یەكەم بەرهەمی بەدیهێنانی سەربەخۆیی ئابوورییە، كە بەپێی راپۆرتی وەزارەتی سامانە سروشتییەكان هەناردەی نەوتی هەرێم لە نیسانی 2015 گەیشتە 560 هەزار بەرمیل لە رۆژێكدا لە هەموو كێڵگە نەوتییەكانی كوردستان بە كەركووكیشەوە، هەموو ئەم نەوتەش بە رێگەی بۆرییەكانی كوردستان هەناردە دەكرێن كە بەستراونەتەوە بە بەندەری جیهان لە توركیاوە.
رۆڵی ئیقلیمی و شكۆی نێودەوڵەتی
لەسەر ئاستی ئیقلیمی و نێودەوڵەتی، رۆڵی سەرۆك مسعود بارزانی لە چەسپاندنی پێگەیەكی نێودەوڵەتیی دیار و رۆڵێكی ئیقلیمی چالاك بۆ هەرێمی كوردستان بۆتە بەشێك لە راستییەكانی واقیع و دۆست و دوژمن شاهیدی بۆ دەدات.
سەرۆك بارزانی لە سەر بنەما و پرەنسیپی ئەو خەباتەی گەلەكەمان و ئەو قوربانییە گەورەی داویەتی، كۆڵەگە و بنەمای سیاسەتی دەرەوەی كوردستانی دامەزراندووە، ئەم سیاسەتە ئەو سەردانانە ئیقلیمییانەی لێ بەرهەمهاتووە، لە پێش هەموویانەوە سەردانی ئوردن و ئەو پێشوازییە فەرمییەی شای ئوردن لە چوارچێوەی دانپێداناندا لە بەڕێزیانی كردووە، هەروەها دەوڵەتانی دیكەش وەك كوەیت و توركیا، كە ئەمەش لە خۆیدا پیشاندانی ئاستی سەركەوتنی سەرۆك بارزانی-یە بۆ پێشخستن و دەرخستنی رۆڵی كورد لە ناوچەكەدا.
سەرۆك بارزانی لە میانەی سەركەوتنە گەورەكانی بۆ دەربڕینێكی ورد بۆ داواكارییە رەوایەكانی گەلی كوردستان و پابەندبوونی بە پرەنسیپی ئازادی و سەربەخۆیی و مافی گەلەكەمان لە بڕیاردانی چارەنووسی هەرێمی كوردستان لەسەر ئاستی میحوەری ئیقلیمی دەركەوت، بەمەش توانی بگاتە تێگەیشتنی ئیقلیمی و ستراتیژی لەگەڵ گرنگترین دەوڵەتانی ناوچەكە.
دیارە سیمبولی و ساڵانی دوور و درێژی خەبات و لوژیكی لە سیاسەتدا و پێگەی لەناو سەركردەكانی ناوچەكە، هۆكاری ریشەیی بووە بۆ دروستكردنی پردی گرنگی دیپلۆماسی لەگەڵ پادشا و سەرۆكەكانی ناوچەكە، هەموو ئەمانەش سەرەنجام خزمەتی ئامانج و تێڕوانینەكانی گەلی كوردستانی كردووە. لەسەر ئاستی نێودەوڵەتیش لە ئەوروپاوە تا كۆماری چین، لە ئەمریكاوە تا رووسیا، لە توركیا تا دەوڵەتانی كەنداو، سەرۆك بارزانی پرسی گەلی كوردستانی خستە سەرمێزی وتووێژێكی جددی و لە كۆشكی سپی، یەكێتی ئەورپا، فاتیكان، كۆڕبەندی ئابووری داڤۆس و كۆنفرانسی میونیخ بۆ ئاسایشی جیهانی باسی لەسەر كرا.
هەوڵە گەورەكانی سەرۆك بارزانی بەرهەمی ئەوە بووە، كە بەردەوام هەوڵیداوە لایەنە نێودەوڵەتییەكان لە رەهەندەكانی پرسی كورد تێبگەن، هەروەها پاڵنەرێك بووە بە ئاراستەی پشتگیری تەواو بۆ ئیرادەی گەلەكەمان بۆ بڕیاردان لە چارەنووسی خۆی. ئەمەش وایكردووە كۆمەڵگەی نێودەوڵەتی و جیهانی دیموكراتی بە چاوی رێزەوە سەیری هەرێمی كوردستان بكەن و دان بەو رۆڵە مێژووییەدا بنێن كە گەلەكەمان گێڕاویەتی.
بەمجۆرە سەرۆك بارزانی لە ماوەی دووساڵی رابردوودا توانی هەنگاوی گەورە بە ئاڕاستەی تێگەیشتنی نێودەوڵەتی و ئیقلیمی بۆ مافی چارەنووسی گەلەكەمان بەدەست بهێنێت. ئەمانەش دەستكەوتی مێژوویین و رەهەندی دوورمەودای هەیە و دامەزراندنی كۆڵەگەی دانپێدانانی نێودەوڵەتییە بە چەسپاندنی مافەكانی گەلی كوردستان.
جەنگی چارەنووسسازی لە دژی داعش ــ شەڕ بۆ سەربەخۆیی
لەسەر ئاستی سەربازی و ئەمنی، ڕاستیەكی حاشاهەڵنەگرە كە هەرێمی كوردستان بارێكی قورسی سەربازی و ئەمنی وای كەوتۆتە سەرشان، كە سوپای وڵاتانێك بە توانایەكی بێشوماری وەك سوپای عێراقەوە نەیانتوانی شان بدەنە بەری.
هێزی پێشمەرگەی قارەمان توانیویەتی ستراتیژیەتی جەنگەكە لە بەرگرییەوە بگۆڕن بۆ هێڕشبردن، ئەوەش لە پاش چەند سووكە شەڕێكی پێشتر، سەركەوتنەكانی پێشمەرگە بووەتە وێردی سەرزاری سەركردەكانی جیهان و هۆیەكانی ڕاگەیاندنی خۆرئاوایی بە سەرسامی و بایەخێكی زۆرەوە باسیان لێوە دەكرد، هێزەكانی پێشمەرگە بە بێ چەندو چوون بوون بە هێزێكی گورزوەشێنی گورچكبڕ كە بەرگری لە كوردستان دەكەن و لە بری هەموو وڵاتانی جیهانی ئازاد و دیموكراتیش دژ بە هێزی تاریكی و تیرۆریستان وەستانەوە.
لێرەوە دەكرێت ئاماژە بدەین بەو جەنگانەی كە بۆ ئازادیخوازی و پاراستنی خاكی كوردستانی ئازیزمان دەكرێت، حەقیقەتێكی ڕوونی خستە پێش چاومان، ئەویش ئەوەیە كە هەموو پێكهاتەكانی ئەو ناوچانەی بە دەستی پێشمەرگە ڕزگاركراون، بەتایبەت ئەو پێكهاتانەی لە ناو ناوچە كوردستانییەكانی دەرەوەی هەرێمی كوردستان دەژیێن، هەستیان بە پاڵەوانێتی و لە خۆبوردووێتی هێزەكانی پێشمەرگەو ئاستی بەرزی پارێزگاری لێكردنیان دەكرد.
لە كەركووكی ئازیزدا هێزەكانی عێراقیمان بینی كە چۆن پشتیان لەو شارە كرد و لە ماوەی چەند كاتژمێرێكدا خەریك بوو وەك موسڵ، كەركووكیش بۆ داعش بەجێبهێڵن، هاووڵاتیانی ئەو شارە بە هەموو چین و پێكهاتەكانیانەوە خۆیان لە بەردەم تاریكترین هێزی تیرۆریستی بینییەوە، هێزێك كە لە كوشتن و ماڵوێرانی و بە كۆیلەكردنی منداڵ و ئافرەتان و تاڵان و بڕۆی هەر گوندوشارێك كە كەوتبێتە بەر چنگیان و لە هیچ تاوانێك درێغی نەكردووە، هەر بۆیە پێشمەرگە بە هانای ئەو شارەوە هات و پاڵەوانانی كورد شان بە شانی سەركردەكانیان چەندین داستانی گەورەی بەرەنگاربوونەوەیان تۆماركرد، زۆر ناوچەیان لە بندەستی تیرۆریستان وەرگرتەوە، پارێزگارییان لە دامودەزگاكان و تەلارە دێرینە مێژووییەكانی ناو كەركووك و دەوروبەری كرد.
بەو شێوەیە كوردستانیبوونی كەركووك بەرجەستەكرایەوە، نەك لە میانەی مافە مێژوویی و ئیتنییەكانی ڕاستەقینەیی گەلی كوردەوە بە تەنیا، بەڵكو بە خوێنی ئاڵ و گەشی ئەو پێشمەرگانەی گیانی خۆیان كردە قوربانی لە پێناوی پاراستنی كەركووكدا ئەو شارەیان وەك شوورا و قەڵاو پێكهاتەكانی ناوی بە پتەوی پاراست، پێكهاتەكانی كەركووك پێش ئەوانی تر بانگەوازیان دەكرد بۆ بایەخ و گرنگێتی لكاندنەوەی فەرمییانەی كەركووك بە كارگێڕی خۆبەڕێوەبەری هەرێمی كوردستانەوە، تا ببێتە ئیدارەیەكی بەهێز و پتەو، لە ژێر سایەی پێشمەرگەكانی كە بستێك لە خاكی كەركووك بە هەدەر نادەن و سازشی لەسەر ناكەن، هیچ كەسێك جودا ناكەنەوە لە پارێزگاریكردن و خزمەتكردنیدا و هەمووان بە یەكچاو تەماشا دەكەن.
لەم ڕووەوە و لە میانەی تاوتوێكردنی واقیعی پاڵپشتیی نێودەوڵەتییەوە، بەتایبەتی لە بواری چەكداركردن و مەشق پێدان و ئەو هەوڵە بێوچانانەی لەلایەن سەرۆك بارزانی دەدرێت، وڵاتانی زلهێزی وەك فەرەنسا و ئەڵمانیا بە هەنگاوی كاراوە لەو بوارەدا هاتوونەتە پێشەوە، هاریكاریی ستراتیژیانەی سەربازی و مەیدانی بووەتە سیمایەكی ڕوون كە پاڵپشتە بۆ پەرەپێدانی هێزەكانی پێشمەرگەی كوردستان و ڕەهەندی دووری ئایندەی لێ دەخوێندرێتەوە.
لە میانەی شرۆڤەكردنمان بۆ هەڵوێستی ئەمریكایی بەتایبەتی ئەو دەنگدانەی ئەم دواییانەی ئەنجومەنی پیران سەبارەت بە چەكپێدانی ڕاستەوخۆی هێزەكانی پێشمەرگە، دەركەوت هەڵوێستی ئەمریكا بەستراوەتە بە ئیرادەیەكی سیاسی زیاتر وەك لەوەی ئیرادەیەكی یاسایی بێت.
دەنگدانی ئەنجومەنی پیرانی ئەمریكایی بە زۆرینەی دەنگەوە لە بەرژەوەندی چەكپێدانی ڕاستەوخۆی پێشمەرگە یەكلابۆوە، بە دەنگپێدانی 54 دەنگ لە بەرانبەر 45ی دژ، بەڵام بەپێی یاساكانی ئەنجومەنی پیرانی ئەمریكی پێویست بوو 60 دەنگ بهێنێت تا ببێتە یاسا، بەو شێوەیە دەتوانین بڵێین سەرەڕای تێنەپەڕاندنی یاساكە، بەڵام زۆرینەی ئەنجومەنی پیرانی ئەمریكا لەپاڵ پێشمەرگەدا دەوەستن.
دەكرێت پێشنیار بكەین لە ڕێی ئەم وتارەوە پێویستە كار بكەین بە شێوەیەكی چڕ و پڕ لەگەڵ ئیدارەی ئەمریكایی بۆ كاراكردنی بڕیاری ژمارە 1208ی ساڵی 2004، كە بەو بۆنەیەوە دەسەڵات دەدات بە وەزارەتی بەرگری ئەمریكا لەگەڵ ئەو هێزانە كاربكات كە ڕاستەوخۆ دژ بە بەرەی تیرۆریستانن، بێ ئەوەی پەنا وەبەر حكومەتی ناوەندی ببرێت، ئەم بڕیارە بە كردنەوەی دەرگایەك دەزاندرێت بۆ ئەوەی هێزەكانی پێشمەرگە دەستیان بە چەك و مەشقی پێویست بگات، بێ ئەوەی تێكەڵ بەو ڕۆتین و ئاڵۆزییانەی گەیاندنی ببن كە بە میزاج و ڕەزامەندی حكومەتی بەغدا دەبەسترێتەوە.
تەحەدییەكانی قۆناغەكە و كاری پتەوی سیاسی
هەروەكو باسمانكرد، هەرێمی كوردستان بە سەركردایەتیی دلێرانەی سەرۆك بارزانی و بەكاری جددی حكومەتی هەرێمی كوردستان، توانیویەتی ئەجێندای خواستەكانی گەلمان بخاتە قۆناغێكی پێشكەوتوو و لە ریزی گرنگترین پرسی نێودەوڵەتی و ئیقلیمی كە كۆمەڵگەی مەدەنی دانی پێدا دەنێت و گوێش بۆ دەنگ و ئیرادەی گەلی كورد رادەگرێت.
لە پێشەنگی خوێندنەوەی وردمان بۆ ئەمە پێویستە باسی گرنگترین تەحەددییەكان بكەین كە رووبەڕووی بەدیهێنانی هیوای كورد دەبێتەوە كە زۆر نزیك بۆتەوە. رێكخستنی ناوخۆی ماڵی كورد لە سەرووی ئەولەوییاتی پارتی دیموكراتی كوردستانە و لە سەرووی ئەو تەحەددییانەیە كە دێنە رێی وەدیهێنانی داخوازییەكانی كورد لە ئازادی و سەربەخۆییدا.
بە درێژایی دەیەكانی رابردوو، دۆستان و هاوپەیمانان ئێمەیان تۆمەتباركردووە، دوژمنانیش پێیانوا بووە ئێمە یەكێتیی ریزی سیاسیمان نییە بۆ وەدیهێنانی ئەو ئامانجە رەوایانە، هەروەها خەونی دەوڵەتی كوردی بە هۆی ململانێی سیاسیی نابەرپرسیارانە تا هەنووكە شكستی هێناوە. وێڕای ئەو قوربانییانەی گەلەكەمان داویەتی، هەروەها ئەو خوێنەی كە رژاوە و تا ئێستاش هەر بۆ پاراستن و ئازادیی كوردستان بەردەوامە، بەڵام دیدگای تەسكی حزبایەتی تا ئێستا بۆتە لەمپەر لەبەردەم هەنگاوهەڵێنانی فراوان بۆ بەدیهێنانی ئاواتەكانی گەل.
بۆیە دەبینین كە پرۆسەی سیاسی لە هەرێمی كوردستان رووبەڕووی دڕندەترین هێرش بۆتەوە كە هێزگەلی ئیقلیمی هەندێ لایەنی بەڕێوەدەبەن، لە زۆربەی لایەنەكانی دیكەش (بەداخەوە) لایەنی كوردین كە بە تەواوی گوێ بە گرنگی و چۆنێتی قۆناغی مێژوویی نادەن كە لە ئێستادا هەرێمی كوردستانی پێیدا تێپەڕدەبێت، ئەمانە نایانەوێت بەشداری بكەن لە لەئەستۆگرتنی بارگرانیی ئەم قۆناغە. دواسیناریۆش كە ئەم لایەنانە لە پەرلەمانی كوردستان خستیانەڕوو هەڵوێستێكی هەلپەرستانەی نابەرپرسانە بوو لە قۆناغێكدا كە بە ناسكترین و گرنگترین قۆناغ دەژمێردرێت كە گەلەكەمان پێیدا تێپەڕدەبێت، كە هیواخوازە ئەنجامی باشی بەرەو سەربەخۆبوونی لێبكەوێتەوە.
ئێمە لە قۆناغێكی مێژووییداین، ئەوەی لە هەموو شت زیاتر پێویستە پارێزگاریكردنە لە سەربەخۆیی بڕیاری كوردییە، بەتایبەتیش لەو پرسانەی كە ناوخۆیین و بەردی بناغەی یەكەمی دەوڵەتی كوردستانن كە خەونی هەموو هاووڵاتییەكی كورد و كوردستانییە. بەڵام مخابن لە جیاتی ئەوەی هەموو توانا و هەوڵەكانی سیاسی و سەربازی بە ئاراستەی ئامانجە پیرۆزەكان بێت، دەبینین هەندێ هێزی سیاسی هەوڵدەدەن پرۆسەی سیاسی بۆ دواوە بگەڕێننەوە، هەوڵیش دەدەن نانەوەی ئاژاوەی ساختەی سیاسی بخرێتە پێشەوەی پرسەكانی سەر گۆڕەپانی سیاسی لەسەر حیسابی بەرژەوەندییەكانی ستراتیژیی گەلی كورد.
لێرەدا ناچینە نێو وردەكاریی هەڵوێستە نایاساییەكەوە، چونكە گەلەكەمان و سەرجەم حزبە سیاسییەكانی دیكە نیگەرانی و پرۆتستۆی خۆیان بەرامبەر ئەم هەڵسوكەوتە چەوت و بێ پاساوە دووپات كردەوە، بەڵام ئەوەندە بەسە كە بڵێین شانازییە بۆ پارتی دیموكراتی كوردستان كە نوێنەرایەتیی ئیرادەی زۆرینەی گەلی كوردستانی كردووە و لە هەڵبژاردنە راستەوخۆ و ئازادەكاندا پێگەی بەرجەستەی بووە. پارتی دیموكراتی كوردستان ئەو حزبەیە كە هەڵوێستی سیاسیی سەربەخۆ لە ئەستۆدەگرێت، كە لە سەر بنەمای دیموكراسییەكی پتەوەوە بنیادنراوە كە هەڵبژاردنی راستەوخۆی سەرۆكی هەرێمی كوردستان ئەنجام بدرێت. گەلی كوردیش رۆڵ و مافی خۆی هەبێت لە پێدانی شەرعییەت بەو كەسەی كە دەزانێت شایستەیە بۆ نوێنەرایەتیكردن و سەركردایەتی كردنی، تاكو لەو قۆناغە پڕ لە تەحەددییانە رزگاری بكات، ئەم قۆناغە كە بە هەوڵی خەباتگێڕانی گەلەكەمان و سەرۆك بارزانی و دەستكەوتە گرنگ و گەورەكانی حكومەتی كوردستان تێگەیشتنێكی تازەی نێودەوڵەتی بۆ چۆنێتیی پرسی كورد گەڵاڵە كردووە، هەروەها رۆڵی هەرێمی كوردستانیشی چ لە رۆژهەڵاتی ناوەڕاست و چ لەسەر ئاستی نێودەوڵەتی چەسپاندووە.
بۆیە دەڵێین وێڕای ئەوەی ئێمە قەبارەی ئەو تەحەددییاتە دەزانین كە رووبەڕووی گەلەكەمان دەبێتەوە، هەروەها قەبارەی پیلانە ئیقلیمییەكان كە بۆ لێدانی دەستكەوت و قوربانییەكانی گەلەكەمان سازدەكرێن، بەڵام گەشبینین بە پێڕاگەیشتنی هۆشیاریی سیاسیی گەلەكەمان، باوەڕیشمان بە توانای خۆمان و هێزی پتەوی سەركردایەتییەكەمان هەیە، بڕواشمان هەیە بە رەوایەتیی كێشەی كوردستانی و داخوازییە رەواكانمان، بۆیە هیوادارین و گەشبینین بە سبەینێیەك كە سەربەخۆیی تێدا بێتەدی و سەروەریی كوردستانیش ببێتە واقیع و راستی.
* ئەندامی مەكتەبی سیاسی پارتی دیموكراتی كوردستان
Top