هێشتا یەكێك لە گرفتە كۆنەكانی ئەم عێراقە نوێیە بریتییە لە تێكەڵكردنی سیاسەت و فەتوای ئایینیی، فەتوایەك كە تیایدا موفتییەكی ئایینی كاری سیاسەتمەدارێك دەكات!
بۆیە كە ژمارەیەك لە عێراقییەكان پرسیاری حوكمی شەرع دەكەن لە (شێخ عەبدولمەلیك ئەلسەعدی) لە بارەی كێشەی كەركووك و رەوایەتی گەڕانەوەی بۆ سەر هەرێمی كوردستان بەم پرسیارە (ما هو الحكم الشرعي في قضية كركوك ومحاولة إلحاقها بما يُسمَّي الإقليم الكردي أو الحكم الذاتي أو النواة للفدرالية؟) شێخ لە وەڵامێكدا كە لە سایتەكەی خۆی (ئەلئوممەت ئەلوەسەت) لە (ركن الفتاوی) بڵاوكراوەتەوە، لە بەشێكیدا دەڵێت : (أمَّا كركوك: فإنَّها جزء من العراق، وهو كمزهريَّة تضم أنواعا من الأزهار، أكرادا وعربا وتركمانا ومسلمين وغير مسلمين، لا يجوز أن تُحسب لطائفة استقلالا دون أخري لتكون فيها تبعا والدعوة إلي ضمِّها إلي إقليم: دعوة إلي استمرار التفرقة وإثارة الفتنة بين أبنائها فالواجب الإسلامي يُحتِّم علينا جميعا أن تبقي لجميع قاطنيها، وتُدار من قبلهم بكل أعراقهم وانتماآتهم تحت إشراف الحكومة المركزية، ولا يجوز أن تُضم إلي أيِّ مُحافظة أو إقليم آخر والواجب علي القادة السياسيين في شمال العراق أن يحرصوا علي وحدة العراق وتجنب أي لقب أو عنوان يدل علي عزل جزء منه عن الجزء الآخر فضلاً عن الدعوة إلي ضمِّ أجزاء أخري إلي جزء لا يجوز شرعا استقلاله عن الأجزاء الأخري وليحذر الجميع من مسؤولية الباري جلَّ شانه أوَّلاً والأجيال القادمة ثانيا من القضاء علي وحدة أراضي العراق وشعبه الذي عاش ألوف السنين بوحدة وأخوة ووئام) .
واتە : (كەركووك بەشێكە لەعێراق و وەك گوڵدانێك وایە پڕ لە گوڵی جۆراوجۆری وەك كورد و عەرەب و توركمان و موسڵمان و غەیرە موسڵمان، نابێت بكرێتە بەشی لایەنێك بەتەنها و ئەوانی دیكەش ببنە پاشكۆ.
بانگەشەكردنیش بۆ ئەوەی بخرێتە سەر هەرێمێك بانگەشەیە بۆ بەردەوامبوونی ناكۆكیی و هەڵگیرسانی فیتنە لەنێوان رۆڵەكانیدا، بۆیە ئەركی ئیسلامیی هەموومان وا داوادەكات كە بۆ هەموو دانیشتووانەكەی بێت و لەلایەن خۆیانەوە بەڕێوە ببرێت بە هەموو رەگەز و پێكهاتەكانیەوە لە ژێر سەرپەرشتیی حكومەتی ناوەندیدا، جائیزیش نییە بخرێتە سەر هیچ پارێزگایەك، یان هەرێمێكی دیكە. ئەركیشە لەسەر سەركردە سیاسییەكان لە باكووری عێراق كە بەتەنگ یەكپارچەیی خاكی عێراقەوە بن، خۆشیان دوور بگرن لە پێدانی هەر نازناو و ناونیشانێك كە دەبێتە ئاماژەیەك بۆ دابڕینی بەشێك لە بەشێكی دیكە، چ جای ئەوەی داوای خستنەسەری چەندبەشێك بكەن بۆ سەر بەشێك كە بەپێی شەرع جائیز نییە سەربەخۆ بێت لە بەشەكانی دیكە. با هەمووانیش وریا بن لە بەرپرسیارێتییان یەكەم لە بەرامبەر خودا و دووەمیش لە بەرامبەر نەوەكانی ئایندەدا لەوەی یەكپارچەیی خاك و گەلی عێراق لەناو بەرن، كە هەزاران ساڵە لەیەكێتی و برایەتیی وتەباییدا دەژین).
تائێرە كورتەی وەڵامەكەی شێخە بۆ ئەو كەسانەی كە ئەو پرسیارەیان لێكردووە. ئێمەش وەك هەر هاووڵاتییەك كە شارەزاییەكی كەمیشی هەبێت لە دەستوور و یاسا و جوگرافیا و مێژووی عێراقدا دەزانین كە:
یەكەم: ئەم فەتوا سیاسییە و هاوشێوەكانی هیچ مانایەیەك بۆ دەستوور ناهێڵنەوە كە زۆرینەی عێراقییەكان دەنگیان بۆ داوەو كردوویانە بە حەكەم و موفتی نێوان خۆیان و نوێنەرانی عێراقییەكانیش لە پەرلەمان بەپێی یاسا ماددەكانی رێك دەخەن.
دووەم: سنوورە نێودەوڵەتی و نێوخۆییەكانی وڵات و پارێزگاكان خواكرد نین، بەڵكو مرۆڤەكان خۆیان كێشاویانە و ئێستاش دانیشتووانی هەر پارێزگا و هەرێمێك خۆیان ئازادن لەدیاركردنی چارەنووسی خۆیان.
سێیەم: ئەوەی ئاگای لە جوگرافیا و مێژووی ناوچەكەش بێت، دەزانێت كە تەمەنی ئەم عێراقەی ئێستا هێشتا كەمتر لە سەدەیەكە، نەك هەزاران ساڵ بێت، دیاریشە كە لە یەكێتی و برایەتی و تەباییشدا نەژیاون، بەڵكو تا ئێستاش لەشەڕو ململانێدان.
چوارەم: فەتوای ئایینی بۆ چارەسەركردنی كێشەی نێوان ئەو تاكانەیە كە خۆیان ئەو موفتییەیان بەلاوە پەسەندەو قەبوڵیان كردووە بیكەنە حەكەم و ناوبژیوان و فەتواكەیشی هەر بۆ ئەوان مولزیمە، بۆیە نابێت موفتی تایبەت بە تایەفەیەك، یان پێكهاتەیەك، فەتوای گشتیی بۆ هەمووان بدات.