توندڕەویی ئایینی هۆكاری یەكەمی تیرۆرە
عه‌بدولره‌حمان سدیق
یەكەم: توندڕەویی ئایینیی لە ساڵی (2001)ـەوە بزوێنەری سەرەكیی هێرشە تیرۆریستییەكان بووە لەجیهاندا.
دووەم: تەنها لە ساڵی (2013)دا، تیرۆر بۆتە هۆی گیان لەدەستدانی نزیكەی (18000) كەس.
سێیەم: لە(66%)ی ئەو هێرشانە لەلایەن (4) گرووپەوە بووە كە ئەوانیش بریتی بوون لە: گرووپی داعش، بۆكۆحەرام، تاڵیبان و قاعیدە.
چوارەم: زیادبوونێك هەبووە لە ژمارەی قوربانییان بەهۆی كردەوە تیرۆریستییەكانەوە، بە رێژەی (5) ئەوەندەی هێرشەكانی یازدەی سێپتەمبەری ساڵی (2001).
پێنجەم: داڕێژەرانی راپۆرتەكە وایدەبینن كە زۆرینەی ئەو رووداوانە لەچەند ساڵی رابردوودا لەلایەن ئەو گرووپە توندڕەوانەوە بووە كە هەڵگری ئەجێندای ئایینیی دیاریكراو بوون.
شەشەم: (80%)ی قوربانیان بەهۆی تیرۆرەوە لە ساڵی (2013)دا لە (5) دەوڵەتدا بووە كە ئەوانیش بریتین لە هەریەك لە عێراق، ئەفغانستان، پاكستان، نایجیریا و سووریا.
بە شیكردنەوەیەكی خێرای ئەم ژمارەو داتایانە دەگەینە ئەو ئەنجامەی كە هەركاتێك ئایین لە رێڕەوی ئینسانی و مرۆیی خۆی دەرهێنرا و ململانێی سیاسی و حزبی پێوە كرا، ئەوسا شەڕ و پێكدادانی تائیفی و كوشتن و تەقاندنەوە زۆر بە روونی دێنەئاراوە، ئەوساش لە جیاتی ئەوەی یەك ئایینی ئەو خەڵكە كۆبكاتەوە، كەچی بە سیاسیكردنی ئایین، خودی ئایینەكە و ئاییندارانیش دابەشدەكات.
ئایینی راستەقینە فێرمان دەكات كە هەرمرۆڤێك وەكو تاك، لەم دنیادا سێ بازنەی برایەتیی سەرەكی دەورەی داوە، كە ئەوانیش بازنەی (برایەتی نەتەوایەتی) و بازنەی (برایەتی ئیمانی) و بازنەی (برایەتی ئینسانی)ن.
واتە، یان لە هەرسێ بازنەكەدا، یان لە دووانییان، یان لە یەكێكیاندا هەر دەبنە برا، بەڵام وا دیارە ئەو بەناو موسڵمان و توندڕەوانە تا ئێستاش لەو راستییە ساكار و جوانانە تێنەگەیشتوون كە یەكێك لە ناوەكانی خوای گەورە (الجامع)ـە، واتە: كۆكەرەوە، كەچی ئەوان هەر حەزیان بە ناكۆكیی و لێكدابڕان و كوشتنی یەكدییە.
ئایین – كە دوور لە ململانێی سیاسیی و حزبیی بێت - زۆر رۆڵی جوانی هەیە:
یەكەم: ئایین یانی خێرخوازی بۆ خزمەتی هەژاران و چارەسەركردنی نەخۆشی و ئەنجامدانی پڕۆژەی خێرخوازی و كاری خۆبەخشی.
كەچی وڵاتانی ئیسلامیی خاوەن سامان و دارایی، ساڵانە لە رێزی پێشەوەی لیستی گەندەڵیدان!!
دووەم: مێژوو دەڵێت: بەهۆی ئایینەوە ئەندازیاریی خانووبەرە پێشكەوت، چونكە ئەندازیاران لە بواری ئایینیدا باشترین كڵێسا و مزگەوتیان بنیاتناوەو، ئێستاش بە ئیلهام وەرگرتن لەو كەلتوورە ناسنامەی بیناسازیی خۆیان دەپارێزن، كەچی (موسڵمانان)ی توندڕەو لە جیهاندا و لە ژێر پەردەی ئاییندا ئاگر لە مزگەوتی یەكتر بەردەدەن و، دامەزراوە و ئاسەوارە مێژووییەكانی یەكتر دەڕووخێنن.
سێیەم: ئایین سیمبوڵی ئینسانییەت و ئاشتییە، كەچی لەم جیهانی موسڵمانانەدا، ئایینزاكان ئایینیان بۆ شەڕ گۆڕیوە، بۆیە شەڕی تائیفی ملیۆنەها منداڵی بێ سەرپەرشت و ملیۆنەها ئافرەتی بێوەژنی خستۆتەوە و هێشتاش بەردەوامە.
چوارەم: ئایین داوای دادپەروەریی كۆمەڵایەتیی دەكات، كەچی لەسایەی ئەم تێگەیشتنە لە دین و مەزهەب وحوكمكردن بەناوی ئایینەوە، ملیۆنەها كەس لە ژێر هێڵی هەژاریدان، كە ئەگەر هەر بەو زەكاتەش بێت كە روكنێكی دینی موسڵمانانە، لە رووی ئابوورییەوە ساڵانە (2.5%)ـی سەرمایەی دەوڵەمەندان بۆ هەژاران دەبێت، كەچی ئەمەش ناكەن.
پێنجەم: ئایین داوا دەكات مرۆڤ وڵاتی خۆی خۆش بوێت، كەچی ئەم بەناو موسڵمان و توندڕەوانە بڕوایان بە چەمكی نیشتمان نییە و، خۆشەویستی وڵات بە بەشێك لە ئایین نازانن.
شەشەم: ئایین داوا دەكات مرۆڤ تەساموح و تۆلیرانس بەخەرج بدات و، تۆڵەسەندنەوە بۆ خوا بەجێبهێڵێت بۆ قیامەت، كەچی توندڕەوانی ئایینی كاری قیامەتیان هێناوەتە دنیا و دنیایان كردۆتە مەیدانی تۆڵەسەندنەوە لەیەكدی، ئەو قۆناغەی ناویشی لێنراوە (ئینتیقالی)، گۆڕیویانە بۆ قۆناغی (ئینتیقامی).
حەوتەم: ئایین كار دەكات بۆ بنیاتنانی كەسایەتی راستگۆ و دەست خاوێن و ناخ پاك و خواویست و خاك پارێز و خەڵكدۆست، كەچی ناخی ئەم ئایینزا تائیفییانەی ئەمڕۆ پڕە لە سرووتی بێگیان و كاری رووكەشی و بوغز و قین و شەڕانگێزی و خوێنڕشتن و كوشتار.
ئەگەر لە ئێستاشەوە جیهانی ئیسلامی پڕۆڤە نەكات لەسەر پڕۆسەیەكی هزریی رەخنەگرانە و، پڕۆژەی فراوانی بەخۆداچوونەوە، ئەوسا راپۆڕتی ساڵانە و نێودەوڵەتییەكان هەر ئەم راستییە تاڵەمان پێ نیشان دەدەنەوە كە وەك توندڕەویی ئایینیی هۆكاری یەكەمی تیرۆرە، موسڵمانانیش هەر ئاوا دەبنە قوربانیی یەكەمی دەستی تیرۆری ئایینی!
