خەریكە نەخشەی كاری ئیسلامیی لەجیهاندا گۆڕانكاریی گەورە بەخۆیەوە دەبینێت، بەتایبەت پاش وەستانەوەی زۆرێك لەكۆمەڵگەی موسڵمان نشین لەوڵاتانی بەهاری عەرەبییدا بەڕووی رێكخراوە ئیسلامییە سیاسییەكان كە بەگەیشتن بەدەسەڵات ویستیان كاری دواخراوی (80)ساڵەیان لە(8) مانگدا بەئەنجام بگەیەنن.
ئەم هەڵە گەورەیەی ئەو ئیسلامییانە وەك زریان وایە كە بەبێ زیان تێپەڕ نابێت، رێك وەك ئەو بزمارانە وایە كە بە هەڵە دادەكوترێن و، بە هەڵكێشانیشیان هەموو هەڵەكە چارەسەر نابێت، چونكە هەڵكێشانی بزمارە بەهەڵە داكوتراوەكان، ژمارەیەك كونی زۆر لەدوای خۆیان بەجێ دەهێڵن، كە پڕكردنەوەیان كار و كاتی زۆری دەوێت!
(برایانی موسڵمان) كۆمەڵێكی پەروەردەیی بوون لەسەرەتادا، رێگەی بانگخوازییان لێ ون بوو، كەوتنە سەر رێگەی سیاسەت، ویستیان بەئایین سیاسەت چاك بكەن، بەڵام بەسیاسەت ئاینیان خراپ كرد.
بۆیە ئەمڕۆ كاتی ئەوەیە (برایانی موسڵمان) واز لەخۆجیاكردنەوە بێنن لەكۆمەڵگەی موسڵمان، چونكە موسڵمانان هەموو بەفەرمانی خودا برای یەكترن.
ئەمڕۆ كاتی ئەوەیە (برایانی موسڵمان) دان بەهەڵەی دەیان ساڵەی كاریاندا بنێن، چونكە ژیانی دنیا لە روویەكدا بەرهەمی هەڵەیەكە كە مرۆڤ لە سەرەتادا كردوویەتی، ژیانیش هەر لەم رووەوە هەلێكە بۆ بەخۆداچوونەوە و خۆ هەڵسەنگاندن و گرتنەبەری رێی گەڕانەوە بۆ بەهەشت.
ئادەم و حەوا (سەلامی خوایان لەسەر) فێریان كردین كە داننان بە هەڵە سەرەتای گەڕانەوەیە بۆ راستی، بەڵام شەیتان چونكە دانی بە هەڵەی خۆیدا نەنا، رێگەی گەڕانەوەیشی لەسەرخۆی داخست.
داننان بە هەڵە، مرۆڤ ئازاد دەكات لە خۆ دیلكردن لە بازنەی سایكۆلۆژیای دوای هەڵەكردن، بۆیە دەڵێن: (مرۆڤی ئازاد كەسێكە كە ئەنجامی هەڵەكانی خۆی لە ئەستۆ دەگرێت).
ئادەم و حەوا بە داننان بە هەڵەی خۆیان ئازادبوون، شەیتانیش بە لە ئەستۆنەگرتنی هەڵەكانی، خۆی لە دیلیدا دۆزییەوە.
ئەزموونەكانی ئەم دواییەی جیهانی ئیسلامیی سەلماندی كەحزبە ئیخوانییەكانی نێو كۆمەڵگای موسڵمان نشین ماڵێكی زۆر بچووكن و، نوێنەرایەتی هەموو موسڵمانانیان لەتوانادا نییە وەك هەوڵیان بۆ دەدا.
ئیدی كاتی هەڵوەشاندنەوەی ئەم چوارچێوە تەنگانەیەو، كاتی ئەوەیە ئایین لەفەزای فراوانی خۆیدا رۆڵی خۆی ببینێت و، كاری حزبایەتیش بدرێتەوە دەست سیاسەتمەداران و خاوەن ئەزموونانی ئەو بوارەو رێبوارانی.
زۆریش گرنگە بزافە ئیخوانەكان بەسنگێكی فراوانەوە گوێ بگرن لەو رەخنانەی ئاراستەیان دەكرێت، ئەگەرنا، ئەوسا رۆژگار وانەیەكی زۆر توندیان فێر دەكات كەباجی گەورەی لەسەر دەدەن لەدەرئەنجامی پشتگوێخستنی بەخۆداچوونەوەو داننەنان بەهەڵەكانیاندا.
(رۆبەرت گرین) لەكتێبی (هێز)دا باس لە (48)یاسا دەكات لە(یاساكانی گەمەی هێز)و، هۆكاری لادانی ئیسلامییەكان لەدەسەڵات بۆ ئەم (4) (داو)ە دەگێڕێتەوە:
یەكەم: كەوتنە داوی هەڵپەكردن بۆ دەسەڵات و لەبیرچوونەوەی ئەوەی دوای گەیشتن بەدەسەڵات پێویست دەكات چی بكەن؟
دووەم: كەوتنە داوی بەئاینیكردنی كێشەكان، لەكاتێكدا شۆڕش لەبەر هۆكاری ئابووریی و ناعەدالەتی بەرپابوو بوو.
سێیەم: كەوتنە داوی تێكەڵكردنی شتێك لەدیموكراسیی و زۆرێك لەبنەماكانی تۆتالیتاریی.
چوارەم: كەوتنە داوی كاردانەوەی توندوتیژو، شەڕكردن لەگەڵ سوپادا.
(رۆجەر هاردی) شیكاركاری كاروبارەكانی رۆژهەڵاتی ناوەڕاستیش، دەڵێت لەشكستی ئیخوانەكان زۆر وانە هەن بۆ سەرنج لێدان، لەوانەش:
یەكەم: گۆڕانكاریی كارێكی ئاسان و خێرا نییە.
دووەم: دەستەبژێرو فەرمانڕەوایانی پێشوو بەئاسانی تەسلیم نابن و دەسەڵات لەدەست نادەن.
سێیەم: رۆژئاوا دیموكراسیی پێ باشە، بەڵام لەسەر حیسابی بەرژەوەندی خۆی نا.
چوارەم: لەو وڵاتانەدا كە سیاسەتی سەركوتكارانەی تێدا پەیڕەو كراوە، دیموكراسیی زوو گوڵ دەرناكات.
پێنجەم: بارودۆخی جیای وڵاتان، ئەنجامی جیا بەدەستەوە دەدەن، بۆیە نابێت چاولێكەریی لەگۆڕانكاریدا بكرێت.
شەشەم: ئیسلامییەكان لەمیسردا هەڵەی گەورەیان ئەوە بوو كەنەیارەكانیان پشتگوێ خست، بەڵام هەڵەی گەورەتریان بەكەم ڕوانین بوو بە سوپا.
حەوتەم: دەنگی ناڕەزایی گەل بەتەنها بەس نییە، بەڵكو گرنگ ئەوەیە چۆن ئەو ناڕەزایەتییە رێكدەخرێت بەئامانجی گۆڕانكارییەكی راستەقینەی هەمیشەیی.