تائێستاش نزیكەی (55) دەوڵەت خۆیان لەژێر چەتری رێكخراوی كۆنگرەی ئیسلامیدا كۆكردۆتەوە، بەڵام ئامادەنین دان بەبوونی دەوڵەتێكی كوردیدا بنێن، یان بەلای كەمەوە كوردستان وەك ئەندامی چاودێر قەبووڵ بكەن، لەكاتێكدا كەچاك دەزانن سەڵاحەددینی ئەیوبی چ پێگەو ناوبانگێكی هەیە لەجیهاندا بەگشتیی و لەجیهانی ئیسلامیشدا بەتایبەتی.
بۆیە ئەمڕۆ دەبێت لەو راستییە بگەین كە گەلان و نەتەوەی زیندوو، ئەوانەن كە كار و كردەوە چاكەكانی رەمز و سیمبولەكانی دەبێتە گیانێكی واتایی و، دەچێتە جەستەیانەوە، بۆیە ئەو گەلانەش كە لەبەر زۆر هۆی سیاسیی و ئایدیۆلۆژی، رۆژێك لە رۆژان دەست بەرداری هەندێك لە (رەمز)ـەكانیان بوون، ئێستا لە پاش دەیان ساڵ دەگەڕێنەوەو، پەیكەریان بۆ دەتاشن و، ناوی شوێنە گشتییەكان و شەقام و دەزگای گەورەیان بە نێوەوە ناو دەنێن.
تەنانەت وڵاتی وا هەیە كە رەنگە لە رێگەی یەك كەسایەتی ناودارەوە بناسرێت، بۆیە ئەو وڵاتانە ساڵانە لەهەوڵی بەستن و سازدانی كۆڕ و كۆبوونەوەو كۆنگرەن و، سەدان كەسایەتی و پسپۆڕی جیا جیاش بانگهێشت دەكەن بۆ ئامادەكردنی باس و لێكۆڵینەوە لەسەر ئەو رەمز و كەسایەتییانە...
لە توركیادا فیستیڤاڵی لەم جۆرە بۆ یادی (محمد الفاتح) و (سەعید نوورسی) كراوەو دەكرێت و چەندین باس و نووسینیان لە بارەوە پێشكەش كراوە، چونكە لە كۆتاییدا مەسەلەكە هەر دەچێتەوە سەر خەرمانی كەڵەكەبووی وڵاتەكە.
لە (پاكستان)دا بۆ (محەمەد ئیقبال) كراوەو، لە (تونس)یشدا بۆ (ئیبن خەلدون) دەكرێت.
بۆ ئێمەی كوردیش، لەسەرتاسەری جیهان بە گشتی و، جیهانی ئیسلامیی بەتایبەتی، (سەڵاحەددین) بۆتە ئەو رەمزە ئایینیەی كە گەلەكەمانی پێ دەناسرێتەوە، بۆیە جێگەی خۆیەتی كە لە بیری ئەوەدابین فیستیڤاڵێكی یان كۆبوونەوەیەكی فراوانی چەند رۆژیی لە (دوو) یان (سێ) ساڵ جارێكدا لە كوردستان بۆ ساز بكەین و، كەسایەتی ئیسلامیی و مێژوویی و سیاسییەكانی جیهان و ناوخۆی بۆ بانگهێشت بكەین بەمەبەستی پێشكەشكردنی باس و لێكۆڵینەوە لە سەر لایەنە دیار و نا دیارەكانی ژیانی (سەڵاحەددین) و دەوڵەتەكەی، لە كۆبوونەوەیەكی فراوانی ئاواشدا سوود و قازانجی باش بۆ كوردستان و ئەزموونەكەی بەرجەستە دەبێت لەوانەش:
یەكەم: گێڕانەوەی (سەڵاحەددین)و سەركەوتنەكانی بۆ شوێنی راستەقینەی خۆی كە كوردستانە، چونكە ناكرێت لە هەموو دنیادا كۆڕ و باس لەسەر (سەڵاحەددین) بكرێ و ساز بدرێت و، ئێمەی كوردیش بێ دەنگ بین.
دووەم: تیشك خستنە سەر هەوڵەكانی لە بوارەكانی تری ژیاندا -جگە لە سەربازیی- وەك بواری زانستی و ئەدەبی و هونەری و ئاوەدان كردنەوە، چونكە (سەڵاحەددین) جگە لە رزگاركردنی (بیت المقدس)، یەكەم كەسیش بوو كە سیستمی (المساجد المدرسیە)ی داهێناو، قەڵای ناوازەو گەورەی دروست كردو، ئەندازیارێتی لە سەردەمی ئەودا زۆر بەرەوپێش چوو شارەكانی رێك خست، زانكۆی (ئەزهەر)ی ئاوەدان كردەوە، زیاتر لە (26) قوتابخانەی گەورەی لەچەشنی زانكۆی دروست كرد، بایەخی بە زانایان داو، ئافرەت لە سەردەمی ئەودا وانەی شەرعیان بە پیاوان دەوتەوەو، نووسین و لێكۆڵینەوەی زۆر لەو سەردەمەدا پێشكەش كران، كە هەموو ئەمانە دەبێت تیشكیان بخرێتە سەر.
سێیەم: جەخت كردنەوە لە سەر ئەو راستییەی كە بەشێكی گەورەی مافەكانی گەلی كورد، دەبێت لەلایەن وڵاتانی ئیسلامییەوە پشتگیری لێ بكرێت، چونكە كوردستان بە نەخشەی زلهێزان بەسەر چوار وڵاتی موسڵماندا دابەش كراوەو، ئەو چاكەو دەستكەوتانەی (سەڵاحەددین)یش كەوا لەگەردنی ئەواندا، پێویستە ئەمڕۆ بە رۆڵەو نەوەكانی ئەو بدرێتەوە، ئەوەیش بەوە دەبێت كە ئاوڕ لە كێشە رەواكەی بدەنەوەو، مافی نەتەوەو گەلەكەی (سەڵاحەددین) بسەلمێنن.
چوارەم: جەخت كردنەوەی لەسەر ئەوەی كە دەشێت و رەوایەو شەرعیشە كە كورد لە جیهانی ئیسلامیی دا دەوڵەتی خۆی هەبێت، چونكە ئەگەر لە رووانگەی ئیسلامەوە بڕوانینە دەوڵەتی (ئەیوبی)، ئەوا دەوڵەتێكی فراوان بووەو، لە كوردستانەوە بۆ (لیبیا)و، لەكوردستانەوە بۆ (یەمەن) بووە، كە ئەمەش جۆرێك لە سیستمی كۆنفیدراڵی بووە كە تیایدا دەوڵەتی (ئەیوبی) خاوەنی (سوپا)ی خۆی و، (ئاڵا)ی خۆی و، (دارایی) خۆی بووە.
سەلماندنی ئەم راستییەش لە لایەن ئامادەبووانی كۆبوونەوەیەكی وادا بنمیچی خواستە رەواكانی ئەمڕۆمان لە جیهانی ئیسلامیی دا بەرزتر دەكاتەوە.
پێنجەم: لە پەراوێزی كۆبوونەوەیەكی ئاوا فراوانیشدا، دەتوانرێت چەندین بەرهەمی هونەری و ئەدەبی و كەلەپووری نەتەوەیی و فۆلكلۆری گەلەكەمان پێشكەش بكرێت، بۆ ئاشنا بوونی ئامادەبووان بە لایەنە جۆراو جۆرەكانی ژیانی كوردەواریمان.
شەشەم: ئاشنا كردنی ئامادەبووان بە پێشكەوتنی گەلەكەمان كە لە ئەزموونی نوێی خۆیداو، بەهەوڵی خۆی بە دەستی هێناوە، ئەمەش بە بەسەر كردنەوەی دام و دەزگاكانی حكومەتی هەرێمی كوردستان و سەردانی شارەكانی و شوێنەوارە مێژووییەكان و، باخچەو پارك و سەیرانگاو هاوینە هەوارەكان و، مزگەوتە دێرینەكان و مزگەوتە گەورەو نوێیەكان و، بنكە رۆشنبیریی و هونەری و وەرزشی و مۆزەخانە مێژووییەكان و، حزب و كۆمەڵە و رێكخراوەكان و ئەوانی تر.
ئەمانەو سوودی تری لەم چەشنەش بەدی دەكرێت، ئەگەر بیرۆكەی ئەم پێشنیارە لە واقیعدا بەرجەستە بكرێت، بیرۆكەیەكی ئاواش پێموایە كە پێویستە هەموومان داكۆكی لە سەر بكەین، بەوانەشمانەوە كە تا ئێستا بە (سلبی)یەوە لە رۆڵی (سەڵاحەددین) دەڕوانن، چونكە (سەڵاحەددین) هەرچی لەتوانادابوو كردی، جا ئەگەر بە قازانجی خەڵكی دیكەش تەواو بووبێت، ئەوا با ئەو خەڵكە بخەینە ژێر بەرپرسیارێتی مێژوویی و ئیسلامیی و ئینسانییان و، ئەوەی كە بۆ (سەڵاحەددین) بە رەوای دەزانن، با بۆ رۆڵەو نەوەكانی ئەوی بەڕەوا بزانن.