ل ۱ ێ شوباتا سالا ۲۰۰٤ ێ د رۆژا برایەتیێ و لێبۆرینێ دا (جەژنا قوربانا پیرۆز ) دەستێن چەپەلێن تیرۆرست و دژبەرێن ئازادی و پێکڤە ژیانا کوردستانێ ، گەھشتنە ھەولێرا پایتەخت ، ئەڤ کریارا تیرۆستی لدەمەکی دا بوو کۆ پرانیا خەلکێ کوردستانێ د کوردستانەکا ئارام و ئازاد دا جەژنەگێران بوو، بەرپرس و پلەدارێن ھەرێما کوردستانێ ژێ نەخاسمە پارتی دیموکراتی کوردستان و ئێکەتیا نشتیمانی کوردستان ل بارەگایێ لقا دوو و مەلبەندا سێ پێشوازیا جەماوەرێ خۆ دکر و د ئێک دەم دا ب کریارێن تیرۆرستی یێ خۆ کوژ بسەدان و شەھید و بریندا پاش خۆ ھێلان ، ژمارەکا زۆرا وان سەرکردێن حزبی و فەرماندێن لەشکری و بەرپرسێن میری بوون .
ئەڤە کۆپیتکا بێ رەوشتیێ و بێ باوەریا وان تیرۆرستان بوو کۆ درۆژەکا ھۆ یا پیرۆزا دا ڤێ کریارا تیرۆرستی ئەنجام بدەن و خەلکەکێ سڤیل و بێ تاوان شەھید و بریندار بکەن .
راستە کارەساتەکا زۆرا مەزن و بێ وێنە بوو ژلایێ قوربنبدانێ ، لێ دبنەرەت دا ھەوڵ و گاڤەک بوو ژبووری تێکدانا ئارامیا کوردستانێ کۆ لسەر ئاستێ نمۆنە نەبوون ، وان رێکخستنێن تیرۆرستی دڤیا بڤان کریارێن تیرۆرستی باوەریا خەلکێ کوردستانێ ب حکومەتا ھەرێمێ و سازیێن پاراستنێ کێم بکەت و ڤالاتیەکێ دناڤبەرا خەلکی و دەسھەلاتێ دا درۆست بکەن ، چونکی خەلکێ کوردستانێ باوەریەکا مۆکۆم ب دەسھەلاتداریا کوردستانێ ھەیە و رۆژ بۆ رۆژێ رەوشا ئارامی و ئاڤەدانی و خزمەتگۆزاری بەرەڤ پێشڤە دچوون .
ژلایەکێ دیتر چاڤێن دوژمن و نەیارێن کوردستانێ ب ئێکرێزیا ھێز و ئالیێن کوردستانێ و وێ پێکڤە ژیانا ئایینی و جڤاکی و ھزری یا کوردستانێ رانەدبوون
بتایبەت پارتی و ئێکەتی کۆ لایەنێن سەرەکی یێن ئیدارەدانا ھەرێمێ بوون ، چونکی ئێکگرتن و ئێکرێزیا ڤان ھەردوو پارتیێن سەرەکی یێن کوردستانێ خۆیاکر کۆ ئێکگرتن و ئێکرێزیا ڤان ھەردوو پارتیان فاکتەرێ پاراستن و پێشڤەچوونا کوردستانێ و ئاشتەوایا جڤاکی نە .
لێ خەون و مەبەستێن وان وەکی پێتڤی بجھـ نەھاتن و حکومەتا ھەرێما کوردستانێ و سازیێن ئێمناھیێ شیان کوردستانێ وەکی گزیرتەکا ئارام دناڤ ڤولکانەکا ئاگری ل دەڤەرێ بھێلن ، مخابن پشتی چەند سالا نەیار و دوژمنێن کوردستانێ شیان ئاستێ ئێکرێزیا ھێز و ئالیێن کوردستانێ بتایبەت پارتی و ئێکەتی وەکی پێتڤی نەھێلن و شیان دەستێن خۆ بینە دناڤدا و ژبەر بەرژەوەندێن تایبەت سۆزا ھندەک کەسێن دیارکری راکێشن و ڤێ ئێکگرتنێ لەنگەر بکەن ، کۆ زیانەکا مەزن گەھاندی یە ھەرێما کوردستانێ ژلایێ سیاسی و ئابووری و جڤاکی و بەرھەمێ وێ نە ئێکرێزیێ خیانەتکا شازدێ ئکتۆبەرێ و لدەستدانا پشکەکا زۆرا ئاخا کوردستانێ و برینا بۆدجە و مۆچێ ھەرێمێ و درۆستکرنا قەیرانا ئابووری و دارایی و گەفێن ژناڤبرنا قەوارێ ھەرێما کوردستانێ یە ژلایێ دەولەتا عیراقا شیعەگەری یە .
ب ھەلکەفتا ڤێ بیرەوەریا دلتەزین و ژبووی شادکرنا ماڵباتێن شەھید و بریندارێن ڤێ کارەساتا مەزن و خەلکێ نشتیمان پەروەرێ کوردستانێ و تێھنی یێن ئازادیێ و بھێزکرنا ھەرێما کوردستانێ پێتڤی یە ھەمی ھێز و ئالیێن کوردستانی بتایبەت پارتی و ئێکەتی سازانێ قەبوول بکەن و زۆترین دەم ھەڤگرتنێ درۆست بکەن لسەر پاراستنا قەوارێ ھەرێما کوردستانێ و چارەسەرکرنا قەیرانێن لسەر ھاتینە سەپاندن و بڕینا وان دەستێن ژەھراوی یێن دوژمن و نەیارێن کوردستانێ ئەوێن بووینە ئەگەرێ ڤێ دووبەرەکیێ .
خەلکێ کوردستانێ ژی پێتڤی یە وان کەس و لایەنان دەست نیشان بکەت ئەوێن بووینە ئەگەرێ راکێشانا وان دەستێن ژەھراوی و پاراستنا بەرژەوەندێن خۆ یێن تایبەت لسەر حسابا بەرژەوەندێن گشتی .