پێشمەرگایەتی فێری بڕوا بە خۆبوونی کردین، فێری کردین چۆن بە مەرگی خۆمان بەرگری لە بە ئاسوودە ژیانی خەڵک بکەین، بڕیاری ئەوەی پێداین کۆڵەپشتی ئازادی و سەربەخۆیی لە کۆڵ ببەستین و لەسەر تاتەشۆری کۆیلەیی و ژێردەستەیی کۆڵەپشتیەکە بکەینەوە و، بە چڕینی (ئەی رەقیب) نەفرەت لە سیاسەتی داگیرکارخوازی دوژمنان بکەین و وەڵامی خۆزگەکانی داهاتووی خۆشمان بدەینەوە.
دیکتاتۆری فێری کردین چۆن بەگژ زوڵم و ستەم و سیاسەتی خۆ سەپاندنی ئەم دوژمن و ئەو دوژمن و ئەم داگیرکاری کوردستان و ئەو داگیرکاری کوردستاندا بچینەوە، فێری کردین بە خاکەوە بژین و بۆ خاک بمرین، فێری کردین چۆن لە زوڵم یاخی ببین و چۆن شەڕی زاڵمان بکەین و چۆنیش بەرگری لە مەزڵوومان بکەین.
ڤایرۆسی کۆرۆناش فێری کەرەنتینەی کردین، فێری کردین چۆن خۆمان لە دوژمنە نەبینراوەکانیش بپارێزین، ئەوەتا وەک دەبینین لە هەر شتە و شتێک فێر بووین، بەڵام ئەوەی جێگای پرسیارە لە هەموو شتێک هیچ فێر نەبووین، ئەنفال، کیمیاباران، راگواستن، کۆمەڵکوژی، یەک فەرهەنگی شیعە و سوننەی عەرەب بۆ چەوسانەوە و لەناوبردنی یەکجارەکی کورد، ئەوانە هەموو شتێک بوون و پێویست بوو زۆر شتیان لێ فێر ببین، بەڵام هیچیان لێ فێر نەبووین، لە کاتێکدا دەبووایە لانی کەم لێیانەوە فێری یەکگرتن و یەک هەڵوێستی و کۆدەنگی نەتەوەیی و نیشتیمانی ببین، خۆ ئەگەر هەموو ئەو کارەسات و نەهامەتیانە فێری یەکگرتن و یەک هەڵوێستی و کۆدەنگی نەتەوەیی و نیشتیمانیان کردباین، لەوەشدا سەرکەوتوو دەبووین و وەک ئێستا بە ژێردەستەیی نەدەماینەوە.