لە دەستپێکی شۆڕشی ئەیلول فرۆکەی ئەوکات وەک فرۆکەی ئێستا پێشکەوتوو نەبوون، لە گوندێکی پشدەر رۆژانە دوو گەنج دەکەن بە چاودێر، واتا دەوری (رادار)یان دەبینی، بۆ ئەوەی کە فرۆکە هات هاوار بکەن و بڵێن: هات، ئەوکات خەڵکی ئاوایی بە ژن و پیاو و گەورە و بچوک لە گوند دەردەچوون و خۆیان دەشاردەوە.
رۆژێک دوو گەنج دەبنە چاودێر، تا بەرە بەری رۆژئاوا فرۆکە نایات، یەکیان دەڵێ: ئەرێ بۆ نەڵێین هات؟ با بزانین خەڵک چۆن رادەکات، ئیتر رێکدەکەون و هاوار دەکەن و دەڵێن هات، هات، کە سەیر دەکەن هەموو خەڵکی گوند بە راکەڕاک ئاوایی بەجێ دێڵن، کاتێ گەنجەکان ئەو راکەڕاکەی خەڵک دەبینن، خۆیان دەڵێن: با راکەین، بە خوای راست نەبووایە ئەو هەموو خەڵکە رای نەدەکرد، دوای ئەوە گەنجەکان لە خەڵکەکە باشتر رادەکەن.
کەسە شاروەکانی پشت سایت و پەیجەکانی یەکێتیم وەک ئەو دوو گەنجە دێنە بەرچاو، بەردەوام و هەر جارە و بە جۆرێک باس لە بوونی کێشەی نێوان کاک نێچیرڤان و کاک مەسرور دەکەن، خۆیان لە هەموو کەس باشتر دەزانن کە درۆیە و ئەوان وا پەروەردە نەکراون کێشەیان لە نێواندا هەبێ، بەڵام کاتێ دەبینن هەندێ نەزان و گەوجێنراو لایک و کۆمێنتیان بۆ دەکەن، وەک دوو گەنجەکە بە خۆیان دەڵێن: دیارە ئەوەی گوتوومانە راستە، دەنا ئەو خەڵکە بۆ لایکمان بۆ دەکا و کۆمێنتمان بۆ دەنووسێ؟!