سەروکێ ھەرێمێ، نێچیرڤان بارزانی د سالێن بوری دا، شیا گەلەک کارێن ئەرێنی بو ھەرێما کوردستانێ ئەنجام بدەت و ھەروەسا شیا د کەرتێ ڤەگوھاستن و گەھاندنێ دا پێشکەفتنێن مەزن دەست خوڤە بینیت و نھا ھەرێم ب رێیا دوو فروکخانێن نێڤدەولەتی یێن ھەولێر و سلێمانیێ ب جیھانێ ڤە ھاتیە گرێدان و ئەڤە ژی فاکتەرەکێ گرنگە بو وەرار و پێشکەفتنا ھەرێمێ ب گشتی و ب رێیا لڤینێن گەرم و ب لەزێن بازرگانی و گەشتیاریێ ڤە و ئەڤە ژی سەرەرای وێ چەندێ یە، کو ب ساناھی کرنا کاری یێ بویە سەبەبێ دلخوشیا سیاسی و خەلکێ بیانی و وەلاتێن جیھانێ بو ڤەکرنا قونسلخانە و نووینەراتیێن وان ل ھەرێمێ و گرێدانا دەھان کونگرێن جیھانێ و ھەرێمی و سیاسی و ئابوری و ساخلەمی و پەروەردەیی و چالاکیێن ھونەری و کولتوری ب ساناھی کریە و ھەروەسا ژلایێ بازرگانیێ ڤە، پارتی دیموکراتی کوردستان ل گەل ھەڤپەیمانێن خوە ھەرێما کوردستانێ برێڤە دبر، د بازرگانیێ گەشەکرنەکا بەردەوام روودایە و د دەمەکی دا کو ل سالا ٢٠٠٤ کوژمێ پێک گوھورینا بازرگانی د ناڤبەرا ھەرێما کوردستانێ و وەلاتێن جیھانێ ب تنێ ٤,٢٢٤ ملیار و دوو سەد و بیست و چار ملیون دولار بوون، د سالا ٢٠١٢ دا گەھشتە ١٤,٨٨٩ ملیار و ھەشت سەد و ھەشتێ و نەە ملیون دولاران کو ب رێژا (٢٥٢%) ھاتە زێدە کرن ل ڤێ سالێ دا.
ھەروەسا ل دووڤ ئامارێن وەزارەتا پلاندانانا حکومەتا ھەرێمێ، ل سالا ٢٠١٢ پروژێن وەبەرھینانێ د وارێ بازرگانیێ دا، ژ ٧٣ پروژان پێک دھاتن، ٦٦ یێن خومالی بون و ٢ ھەڤپشک و ٥ پروژە ژی یێن بیانی بون.
بازرگانی ژێدەرەکێ ئابووری یێ گرنگە و ب رەنگەکێ کارا پشکداریێ د ڤەژاندنا جڤاکی دا دکەت. لەورا لیستا پارتی دیموکراتی کوردستان گرنگیەکا زور ب ڤی کەرتێ زیندی ددەت و دڤێت ب رێیا دانانا قانوون و بریاران لڤینێن زێدەتر و دروستتر ب ڤی واری بدەت ژ پێخەمەت ڤێ یەکێ کار دکەت بۆ:
١. دامەزراندنا جھێن بازرگانیا ئازاد ل خالێن سەرەکی و دەڤەرێن دی ل ھەرێما کوردستانێ.
٢. دەرخستنا وان ھەموو یاسا و بریارێن گرنگ ب فەرمانگەھێن چاڤدێریا بازرگانی و دەزگەھێ پیڤانەکرن و کونترولا جۆری ددەن و کاری ل سەر دکەن.
٣. راستڤەکرنا وان ھەموو یاسایێن پەیوەندیدار ب بازرگانیا ناڤخو و دەرڤە، ژ وانا یاسایێَن بازرگانی، کومپانیا، ئێکەتیێن گشتی و ژوورا بازرگانی و پێشەسازی، ئینان و ھنارتنێ و یێن دی.
٤. دەرخستنا وان ھەموو یاسا و بریارێن ھەڤسەنگیێ د تەرازیا بازرگانی و تەرازیا پێدایان دا دروست دکەت و بەرھەمێن نێشتمانی ژ ھەڤرکیێ د پارێزن، ب تایبەتی ژی ل گەل وەلاتێن ھەڤسوو.